މާލެ، ވިލިމާލެ، ގުޅީފަޅު އަދި ތިލަފުށި ގުޅުވައިދައިވޭ ބްރިޖު ހެދުމަށް ކުރަންޖެހޭ މަސައްކަތްތައް ބާރު ސްޕީޑްގައި ކުރިއަށްދާ ކަމަށް ގްރޭޓަރ މާލެ އިންޑަސްޓްރިއަލް ޒޯން ލިމިޓެޑް (ޖީއެމްއައިޒެޑްއެލް) ބުނެފިއެވެ.
ރާއްޖެޓީވީގައި ވާހަކަދައްވަމުން ޖީއެމްއައިޒެޑްއެލްގެ މެނޭޖިންގ ޑިރެކްޓަރ އިބްރާހިމް ރަޝީދު (އިބޫ) ވިދާޅުވީ މާލެ، ވިލިމާލެ، ގުޅީފަޅު އަދި ތިލަފުށި ގުޅުވައިދައިވޭ ބްރިޖަކީ މިސަރުކާރުން ކުރިއަށް ގެންދާނެ އެންމެ ބޮޑު މަޝްރޫއު ކަމަށާއި، އެމަސައްކަތް ކުރުމުގެ ޖީއެމްއައިޒެޑްއެލްއަކީ ސަޕޯޓު ފެސިލިޓީއެއް ކަމަށެވެ.
އެގޮތުން ބްރިޖުގެ މަސައްކަތް ފެށުމަށް ކުރަންޖެހޭ މަސައްކަތްތައް ކުރަމުން އަންނަ ކަމަށާއި، ސަރވޭގެ މަސައްކަތް ބާރު ސްޕީޑްގައި ކުރިއަށްދާ ކަމަށް އިބްރާހިމް ރަޝީދު ވިދާޅުވިއެވެ. އަދި ވިދާޅުވީ ތިލަފުށީގެ ފަޅުތެރެއިން ބްރިޖް ފެށޭ ހިސާބާއި، އަދި ބްރިޖާއި ގުޅޭ މަގުތައް ހެދުމުގެ ޑިޒައިންގެ މަސައްކަތްތައް މިހާރު ކުރިއަށްދާ ކަމަށެވެ. މިމަސައްކަތުގައި އިސްދައުރެއް އަދާކުރަނީ ޕްލޭނިން މިނިސްޓްރީކަން ފާހަގަކުރައްވައި އިބޫ ވިދާޅުވީ ޖީއެމްއައިޒެޑްއެލްގެ އިންޖިނިއަރުންނާއި، ޑިޒައިނަރުން ވެސް މިމަސައްކަތުގައި އިސްދައުރެއް އަދާކުރާ ކަމަށާއި، ގިނަ ބައެއްގެ އެއްބާރުމާލުއި އެހީތެރިކަން ލިބެމުންދާ ކަމަށެވެ. އަދި ކަމާގުޅުން ހުރި ބޭފުޅުންގެ އެއްބާރުލުމާއި، މަޝްވަރާ ތެރެއިން ކުރެވޭ މަސައްކަތްތައް ފުރިހަމަކަން އިތުރުވާނެކަން އިބްރާހިމް ރަޝީދު ފާހަގަކުރެއްވިއެވެ.
ރައީސް އިބްރާހިމް މުޙައްމަދު ޞާލިޙުގެ މިފަސް އަހަރުގެ ތެރޭގައި ގްރޭޓަރ މާލެ ޞަރަޙައްދަށް ބޮޑު ބަދަލެއް އަންނާނެކަން ފާހަގަކުރައްވައި އިބްރާހިމް ރަޝީދު ވިދާޅުވީ މާލޭގެ ވިޔަފާރި ބަނދަރު ގުޅީފަޅަށް ބަދަލުކުރެވިގެންދާނެ ކަމަށެވެ.
އިބްރާހިމް ރަޝީދު ވިދާޅުވީ ވިޔަފާރި ބަނދަރު ބަދަލުކުރުމަށް ކުރަންޖެހޭ މަސައްކަތްތައް ކުރަމުންދާ ކަމަށާއި، ޖީއެމްއައިޒެޑްއެލްއިން ޖެނުއަރީ މަސް ނިމުމުގެ ކުރިން ގުޅީފަޅުގައި އެމަސައްކަތަށް ބިން ހިއްކުމަށް އަންނަ ޓީމު ތިބޭނެ ތަނެއްގެ އިންތިޒާމް ހަމަޖައްސައިދޭނެ ކަމަށެވެ.
24 އަކަށް އެޕާޓްމެންޓް އެބަ ބޭނުންވޭ ގުޅީފަޅުގައި ތައްޔާރުކުރަން އަޅުގަނޑުމެން މިޖެނުއަރީ މަސް ނިމުމުގެ ކުރިން. އެމަސައްކަތް އިރާދަކުރެއްވިޔާ އަޅުގަނޑުމެންނަށް ކުރެވޭނެ ކަމުގެ އުންމީދު އެބައޮތް. އަޅުގަނޑުމެންނަށް 24 އެޕާޓްމެންޓް ސީދާ މިމަހުގެ ނިޔަލަށް ނިންމާ ނުލެވުނު ކަމުގައި ވީނަމަވެސް ކޮންމެވެސް އެހެން އެރޭޖްމެންޓެއްގެ ތެރެއިން ނިންމާފަ ހުރި އެޕާޓްމެންޓްގެ ތެރެއިން ބޭނުންކޮށްގެން ނަމަވެސް އެމަސައްކަތް ކުރަން ތިބެވޭނެ އިންތިޒާމެއް ހަމަޖައްސައިދޭނަން މިމަސް ތެރޭގައި.ޖީއެމްއައިޒެޑްއެލްގެ މެނޭޖިންގ ޑިރެކްޓަރ ރަޝީދު
އިބޫ ވިދާޅުވީ މާލޭގެ ވިޔަފާރި ބަނދަރު ގުޅީފަޅަށް ބަދަލުވެގެން ދިއުމާއެކު މާލޭގެ ތޮއްޖެހުމަށް ކޮންމެވެސް ވަރެއްގެ ޙައްލެއް ލިބޭނެ ކަމަށާއި، އެޞަރަޙައްދުގެ ޓްރެފިކަށް ބޮޑު ލުއެއް ލިބޭނެ ކަމަށެވެ. އަދި އުތުރުފަރާތުގެ މޫދު ފެންނާނެހެން ހިއްގައިމު ޞަރަޙައްދެއް ޢާންމު ރައްޔިތުންނަށް ލިބޭނެ ކަމަށް އިބްރާހިމް ރަޝީދު ވިދާޅުވިއެވެ.
ވިލިމާލޭ ޞަރަޙައްދުގައި ޤާއިމުކުރެވޭ ބްރިޖުތަކަށް ފަންޑު ހޯދުމަށް މިދިޔަ ސެޕްޓެންބަރުމަހުގެ ތެރޭގައި ފޮރިން މިނިސްޓަރު ޢަބްދުﷲ ޝާހިދު ވަނީ ޔޫއޭއީގައި، އަބޫދާބީ ފަންޑް ފޮރ ޑިވެލޮޕްމެންޓް (އޭއެފްއެފްޑީ) ގެ ޑިރެކްޓަރ ޖެނެރަލް މުޙައްމަދު ސައިފް އަލް ސުވައިދީ އާއި ބައްދަލު ކުރައްވާފައެވެ. އަދި އެ ދެ މަޝްރޫއަށް ފައިސާ ހޯއްދަވަން ޝާހިދު ވަނީ އޭޑީއެފްޑީގެ ޑިރެކްޓަރ ޖެނެރަލްގެ އަރިހުން ވެސް އެދިވަޑައިގެންފައެވެ.
ބްރިޖުގެ މިމަސައްކަތަށް ފައިސާ ހަމަޖެހުނު ކަމެއް ނުވަތަ ހަމަނުޖެހޭކަން ސަރުކާރުން ހާމަކޮށްފައެއް ނުވެއެވެ. ނަމަވެސް މިމަ ޝްރޫޢަށް ގާތްގަނޑަކަށް 7.6 ބިލިއަން ރުފިޔާ ޚަރަދުވާނެ ކަމަށާއި، 2020 ވަނަ އަހަރުގެ ފެބްރުއަރީ މަސް ތެރޭގައި ބްރިޖުގެ ޢަމަލީ މަސައްކަތް ފައްޓަވާނެ ކަމަށް ރައީސް ޞާލިޙު ވަނީ ވިދާޅުވެފައެވެ.
