އިސްލާމިކް ސްޓޭޓް (އައިއެސް)، އިރާގުގެ މޫސަލްގެ ހުޅަނގުން ފައްސާލުމަށްޓަކައި އިރާގު އަސްކަރިއްޔާއިން ހިންގާ އޮޕަރޭޝަނުގައި މޫސަލް ގެ އެއާޕޯޓު އަސްކަރިއްޔާގެ އަތް ދަށަށް ގެނެސްފިއެވެ.
ރިޕޯޓުތައް ބުނާ ގޮތުން އެއާޕޯޓު ހިފުމަށް ހިންގި އޮޕަރޭޝަނަށް ގަނޑިތަކެއް ނެގިއެވެ. އެއާޕޯޓުގެ ކޮންޓްރޯލް އައިއެސްއަށް ގެއްލުނު ނަމަވެސް އައިއެސް އިން އެއާޕޯޓާ ދިމާލަށް، ސިޓީގެ އެތެރޭގައި ތިބެ، ހަމަލާ ދެމުންދާ ކަމަށް ރިޕޯޓުތައް ބުނެއެވެ.
އިރާގުގެ އިރުމަތީ މޫސަލް، އަސްކަރިއްޔާއިން ވަނީ މިދިޔަ މަހު އަލުން ކޮންޓްރޯލްގެ ދަށަށް ގެނެސްފައެވެ.
އިރާގު ސިފައިންނާއި އައިއެސް ހަނގުރާމަވެރިންނާ ދެމެދު ހަމަލާތައް ވަރުގަދަވެފައި ވާއިރު ތާށިވެފައި ތިބި އެތައް ހާސް އާއްމުންގެ ރައްކާތެރިކަމާ މެދު ވަނީ ބިރު ހީވެފައެވެ.
ވައިގެ މަގުން ދޭ ހަމަލާތަކުގެ އެހީއާއެކު އިރާގު ސިފައިންގެ އެތައް ސަތޭކަ އަސްކަރީ ވެހިކަލެއް އާދީއްތަ ދުވަހު ވަނީ އައިއެސް ހަނގުރާމަވެރިންގެ ޖަގަހަތަކާ ކައިރިއަށް ޖެހިލާފައެވެ. އިރާގުގެ ދެވަނައަށް އެންމެ ބޮޑު ސިޓީގައި އިރާގު ސިފައިން އައިއެސްއާ ދެކޮޅަށް ހަމަލާދީ ކުރިހޯދަމުންދާއިރު ހަމަލާތައް ރަސްމީކޮށް އިއުލާނުކޮށްފައި ވަނީ އިރާގުގެ ބޮޑުވަޒީރު ހައިދަރު އަލް އަބާދީއެވެ.
