ނާޕޮލީ 1-0 އިން ބަލިކޮށް އިޓާލިއަން ސުޕަ ކަޕް އިންޓަމިލާން ކާމިޔާބުކޮށްފި އެވެ.

ސައޫދީ އަރަބިއްޔާގެ އަލް އައްވާލް ސްޓޭޑިއަމުގައި ކުޅުނު ފައިނަލް މެޗުގައި އިންޓަގެ ހަމައެކަނި ލަނޑު ޖެހީ މެޗުގެ ފަހު ވަގުތުކޮޅުގެ ތެރޭގައި ބެންޖަމިން ޕަވާޑްގެ ޕާހަކުން ކެޕްޓަން ލައުޓާރޯ މާޓިނޭޒެވެ.

މެޗަށް ފަހު އޭނާ ބުނީ މިއީ މި އަހަރުގެ އިޓާލިއަން ކަޕުން އިންޓަ ކަޓާފައިވުމުން، އެކަމުގެ ހިތްދަތިކަމުން އަރައިގަތުމަށް ލިބުނު މުހިންމު ކާމިޔާބީއެއް ކަމަށެވެ.

މެޗަށް ފަހު އިންޓަގެ ކޯޗު ސިމޯން އިންޒާގީ ބުނީ އޭނާގެ ޓީމު މޮޅުވި ނަމަވެސް ނާޕޮލީ އަށް ވެސް މަރުހަބާ ކިޔާ ކަމަށެވެ.

އިޓާލިއަން ސުޕަކަޕް ހަތަރު ޓީމުގެ މުބާރާތަކަށް ބަދަލުކޮށް ސައޫދީގައި މި ފަހަރު ކުޅުނީ އެ ގައުމުގައި ސްޕެނިޝް ސުޕަކަޕްގެ ކުޅޭ ފޯމެޓަށެވެ. އަދި މިކަމަށްޓަކައި މި ފަހަރުގެ މުބާރާތުގެ ޗެމްޕިއަން ޓީމަށް 8.7 މިލިއަން ޑޮލަރު ދޭނެއެވެ. ރަނަރަޕް ޓީމަށް 5.4 މިލިއަން ޑޮލަރު، އަދި ސެމީ ފައިނަލުން ބަލިވާ ދެ ޓީމަށް ވެސް 1.7 މިލިއަން ޑޮލަރު ދޭނެއެވެ. މީގެ އިތުރުން އިޓަލީގެ ފުޓްބޯޅަ ފެޑަރޭޝަނަށް ވެސް ގިނަ އަދަދަކަށް ފައިސާދޭނެ އެވެ.

ސައޫދީ އަރަބިއްޔާއިން ސްޕެނިޝް ސުޕަ ކަޕަށްފަހު އިޓާލިއަން ސުޕަކަޕް އެ ގައުމުގައި ބާއްވަނީ، ސައޫދީން 2034 ވަނަ އަހަރުގެ ވޯލްޑްކަޕަށް ތައްޔާރުވުމަށް ކުރާ މަސައްކަތުގެ ތެރެއިންނެވެ.