ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 އެންމެ ފުރަތަމަ ފެނުނު ޗައިނާއިން ކޮވިޑް-19ގެ އިތުރު 34 ކޭސް ރިޕޯޓުކޮށްފިއެވެ.
އެގައުމުގެ ނޭޝަނަލް ހެލްތު ކޮމިޝަނާއި ހަވާލާދީ ބައިނަލްއަގްވާމީ މީޑިއާ ރިޕޯޓުތައް ބުނާ ގޮތުން، އައު ކޭސްގެ ތެރެއިން 29 ކޭސްއަކީ އެ ގައުމުގެ 2 އަވަށަކުން ފެނިފައިވާ ކޭސްތަކެވެ. އެގޮތުން، 20 ކޭސް ޝިންޖޭންގ ޕްރޮވިންސުން ރިޕޯޓުކޮށްފައިވާއިރު ލިއޯނިންގ ޕްރޮވިންސުން 9 ކޭސް ރިޕޯޓުކޮށްފައިވެއެވެ. 5 އިމްޕޯޓެޑް ކޭސްވެސް އެ ގައުމުން ވަނީ ރިޕޯޓުކޮށްފައެވެ.
ޗައިނާއިން މިހާރު ވައިރަސް އަށް ޕޮޒިޓިވްވެގެން ރިޕޯޓް ކުރަމުން އަންނަނީ އެގައުމަށް އެތެރެވާ މީހުންގެ ތެރެއިން ކަމަށް ނޭޝަނަަލް ހެލްތް ކޮމިޝަނުން ހާމަކުރި ނަމަވެސް ފާއިތުވެގެން ދިޔަ ދުވަސްތަކުގައި ގައުމުގެ އެކި ޕްރޮވިންސްތަކުން އައު ކޭސްތައް ދަނީ ފެންނަމުންނެވެ. އަދި ބަލި އިތުރަށް ފެތުރުނަނުދީ ކޮންޓްރޯލްކުރުމަށް ހެލްތް ކޮމިޝަނުން ވަނީ ޓެސްޓް ކުރެވޭނެ އިންތިޒާމާއި ފިޔަވަޅުތައް އިތުރަށް ހަރުދަނާ ކޮށްފައެވެ.
ޗައިނާއިން މިހާތަނަށް އައިއިރު 83,784 މީހުންނަށް ކޮވިޑް-19 ޖެހިފައިވާއިރު 4,634 މީހުން ވަނީ ވައިރަސް ޖެހިގެން މަރުވެފައެވެ.
