ބުދަ ދުވަހު ފަށާ ސާފް ޗެމްޕިއަންޝިޕް ފުޓްބޯޅަ މުބާރާތުގެ ޝެޑިއުލަށް ބަދަލު ނުގެންނާނެ ކަމަށާއި ވަގުތަށް ނުގޮސްފިނަމަ އިންޑިޔާ އަށް އެތެރެވުމަށް ދީފައިވާ ވިސާ ކެންސަލްކުރާނެ ކަމަށް ސާފުން ބުނެފި އެވެ.

ދެކުނު އޭޝިޔާގެ މައި ފުޓްބޯޅަ ޖަމާއަތުން މިހެން ބުނީ ވިސާގެ މައްސަލަ ހައްލުނުވާތީވެ، ޕާކިސްތާން ޓީމަށް އިންޑިޔާ އަށް ނުދެވި، މޮރިޝަސްގައި ތިބެން ޖެހިފައިވަނިކޮށެވެ.

ބުދަ ދުވަހު ފަށާ މުބާރާތަށް ޕާކިސްތާން ޓީމު އިންޑިޔާގެ ބެންގަލޫރަށް ފުރަން އޮތީ އިއްޔެ އެވެ. ނަމަވެސް މޮރިޝަސްގައި ހުންނަ އިންޑިޔާގެ އެމްބަސީން ވަނީ ޕާކިސްތާނުގެ ޓީމު ނުފުރައި މަޑުކުރަން އަންގައިފަ އެވެ. ސަބަބަކީ އެ ގައުމުގެ ބައެއް ކުޅުންތެރިންގެ ވިސާގެ ކަންކަން މުޅިން ހަމަޖެހިފައިނުވާ ކަމަށް ބުނެ އެވެ. ސާފް ޗެމްޕިއަންޝިޕުގައި ޕާކިސްތާން ކުޅެންޖެހޭ ފުރަތަމަ މެޗު އޮންނާނީ ބުދަ ދުވަހު ހަވީރު އިންޑިޔާއާ ދެކޮޅަށެވެ.

މި މައްސަލައާ ބެހޭ ގޮތުން ސާފްގެ ޖެނެރަލް ސެކްރެޓަރީ އަންވަރުލް ހައްގު ހިލާލް އިންޑިޔާގެ ނިއުސްނައިން ސްޕޯޓްސްއަށް ވާހަކަ ދައްކަމުން ވިދާޅުވީ ޕާކިސްތާނަށް ވަގުތަށް ނާދެވުނަސް މުބާރާތުގެ މެޗު ތަރުތީބަށް ބަދަލު ނުގެނެވޭނެ ކަމަށެވެ.

އޭނާ މިހެން ވިދާޅުވިއިރު ކަރްނާޓަކާ ސްޓޭޓް ފުޓްބޯޅަ އެސޯސިއޭޝަންގެ އޮފިޝަލަކު ނަން ހާމަނުކޮށް ބުނެފައިވަނީ ޕާކިސްތާނަށް އިންޑިޔާ އަށް އެތެރެވުމަށް ވިސާދޭން ދެތިން ދުވަސް ނަގާނެ ކަމަށެވެ.

އޭނާ އަދި ބުނީ މޮރިޝަސްއިން ފުރައިގެން އިންޑިޔާގެ މުމްބާއީގައި މަޑުކޮށްފައި ބެންގަލޫރަށް ދިޔުމަށް ވެސް ގައިގަނޑަކަށް 8 ގަޑިއިރުގެ ވަގުތެއް ހޭދަވާނެ ކަމަށެވެ.

ޕާކިސްތާނާއި އިންޑިޔާ އަކީ ސިޔާސީ ގޮތުން ވަރަށް ވާދަވެރި ދެ ގައުމެވެ. އަދި ދެ ގައުމުގެ ގުޅުން ގޯސްވެ، އެއް ގައުމުން އަނެއް ގައުމަށް ދަތުރުކުރުން ވަނީ މަނާކޮށްފަ އެވެ. މިކަން މިހާރު ކުޅިވަރުގެ މައިދާނަށް ވެސް ވަނީ ފޯރާފަ އެވެ. މިގޮތުން މިދިޔަ މަހު ބޭއްވި ސާފްގެ އެގްޒެކެޓިވް ކޮމިޓީގެ ބައްދަލުވުމަކަށް ޕާކިސްތާނުގެ އޮފިޝަލުން އިންޑިޔާ އަށް ދިއުމަށް ވެސް ވަނީ ވިސާ ނުދީފަ އެވެ. އަދި މުބާރާތުގައި ވިސާގެ މައްސަލަ ފެންމަތިވީ މުބާރާތް ކުޅޭ ޓީމުތަކަށް ވިސާގެ ކަންކަން ހަމަޖެހޭނެ ކަމަށް އިންޑިޔާ ފުޓްބޯޅަ ފެޑަރޭޝަން މެދުވެރިކޮށް ސާފުން އަންގާފައިވަނިކޮށެވެ.