މަރާލާފައިވާ އަދި ގެއްލުވާލާފައިވާ މީހުންގެ މައްސަލަތައް ބެލުމަށް އުފައްދަފައިވާ ކޮމިޝަނުން ތަހުގީގު ކުރަމުންދާ މައްސަލަތަކާއި ގުޅިގެން، ފުލުހުން ހިންގި އޮޕަރޭޝަން ނިންމާލައިފިއެވެ.

ފުލުހުން ބުނީ، މަރާލާފައިވާ އަދި ގެއްލުވާލާފައިވާ މީހުންގެ މައްސަލަތައް ބެލުމަށް އުފައްދަފައިވާ ކޮމިޝަނުން ތަހުގީގު ކުރަމުންދާ މައްސަލަތަކާއި ގުޅިގެން ކޮމިޝަންގެ ބޭނުމަށް، ކޯޓު އަމުރުތަކުގެ ދަށުން ފުލުހުންނަށް ހަވާލުކޮށްފައިވާ ހުރިހާ ކޯޓު އަމުރުތަކެއް ތަންފީޒުކޮށް ނިމިފައިވާތީ ފުލުހުން އަންގާރަ ދުވަހުން ފެށިގެން ހިންގަމުންދިޔަ އޮޕަރޭޝަން މިހާރު ނިމުމަކަށް ގެނެސްފައިވާ ކަމަށެވެ.

މިހާތަނަށް ފުލުހުން ވަނީ މާލެ ސިޓީއާއި އައްޑޫ ސިޓީގައި 17 ތަނެއް އަދި 11 މީހުން ބަލާފާސްކޮށްފައެވެ.

މި އޮޕަރޭޝަނަކީ ބަލާފާސްކުރުމުގެ އޮޕަރޭޝަނަކަށްވާއިރު މިކަމާއި ގުޅިގެން އަދި އެއްވެސް މީހަކު ހައްޔަރު ކޮށްފައެއް ނުވެއެވެ.

މި އޮޕަރޭޝަނަކީ ފުލުހުންގެ ކްރިމިނަލް އިންވެސްޓިގޭޝަން ކޮމާންޑާއި ފޮރެންސިކް ސަރވިސް ޑިޕާރޓްމެންޓް އަދި ޑިވިޒަނަލް ޕޮލިސިންގ ކޮމާންޑުން ކުރިއަށްގެންދާ އޮޕަރޭޝަނެކެވެ. އަދި މޯލްޑިވްސް ޑިފެންސް ފޯސް (އެމްއެންޑީއެފް) ން ވެސް ފުލުހުންނަށް މިކަމުގައި އެހީތެރިކަން ފޯރުކޮށްދެމުން ދާކަން ފާހަގަ ކޮށްލެވެއެވެ.