އައްޑޫ ސިޓީ ހިތަދޫ ފެނަކަ ބްރާންޗުގެ ދެ މުވައްޒަފުން ކަރަންޓްގައި ޖެހި އެކަކަށް އައިސީޔޫގައި ފަރުވާދޭން ފަށާފިއެވެ.
މިހާދިސާ ހިނގާފައި ވަނީ ހިތަދޫ ސްޓޭޑިއަމަށް ކަރަންޓް ދިނުމަށް ހަރަކާތެރިވަމުން ދަނިކޮށްނެވެ.
ހިތަދޫ ރީޖަނަލް ހޮސްޕިޓަލުން ބުނީ ހޮނިހިރު ދުވަހު ހަވީރު 5:00 ކަންހާއިރު ކަރަންޓްގައި ޖެހިގެން ހިތަދޫ ފެނަކަ ބްރާންޗުގެ ދެ މުވައްޒަފުން ގެނެސްފައިވާ ކަމަށެވެ. ކަރަންޓްގައި ޖެހުނު ދެމީހުންގެ ތެރެއިން އެކަކަށް އައިސީޔޫގައި ފަރުވާދެމުން އަންނަ ކަމަށް އެ ހޮސްޕިޓަލުން ބުންޏެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި އައިސީޔޫގައި ފަރުވާދެމުން އަންނީ ހިތަދޫ ބްރާންޗުގެ ސީނިއާ ޓެކްނީޝަން މުހައްމަދު ނާޒިމަށެވެ. އޭނާއާ އެކު މަސައްކަތް ކުރި ޓެކްނީޝަން، މުހައްމަދު މުނައްވަރަށް ވެސް ދަނީ ހޮސްޕިޓަލުގައި ފަރުވާ ދެމުނެވެ.
ހިތަދޫ ރިޖަނަލް ހޮސްޕިޓަލުން ބުނީ ދެމީހުންގެ ހާލުވެސް ރަނގަޅުވަމުން އަންނަ ކަމަށެވެ.
މިކަމާއި ގުޅިގެން ފެނަކަ ކޯޕްރޭޝަންގެ ބަހެއް އަދި ނުލިބެއެވެ.
