ސަރުކާރު ހިންގާ މައި ޕާޓީ، ޕީޕީއެމް އަށް 150،000 މެމްބަރުން ހަމަކުރުން އަމާޒަކަށް ކަނޑައަޅައި، މެމްބަރުން ހޯދާ ފަރާތްތަކަށް ފައިސާގެ އިނާމާއި ބެންކޮކް ދަތުރު ދޭއިރު، މަޖުބޫރުކޮށްގެން ޕާޓީއަށް މީހުން ވެއްދުން ވެސް ކުރިއަށްދާ ކަމަށް ރާއްޖެ އެމްވީއަށް އެނގިއްޖެ އެވެ.

ރައީސް އަބްދުﷲ ޔާމީންގެ ފެކްޝަންގެ ޕީޕީއެމްގެ އޮފީސް، ހުޅުވުމަށް ބުރާސްފަތި ދުވަހުގެ ރޭ ބޭއްވި ޖަލްސާގައި އެ ފެކްޝަންގެ ސެކްރެޓަރީ ޖެނެރަލް، ނިލަންދޫ ދާއިރާގެ މެމްބަރު ޑރ. އަބްދުﷲ ހަލީލް ވިދާޅުވީ، ރިޔާސީ އިންތިހާބަށް އެ ޕާޓީން ކުރިމަތިލާނީ 150،000 މެމްބަރުންނާއެކު ކަމަށެވެ.  

މި ކެމްޕޭނުގެ ފުރަތަމަ ހަރަކާތެއްގެ ގޮތުގައި، ރައީސް އަބްދުﷲ ޔާމީންގެ އަނބިކަނބަލުންގެ އޮފީހުން އިންތިޒާމުކޮށްގެން، ހޮނިހިރު ހަވީރު 5:00 އަށް 10،000 މެމްބަރުން އިތުރުކުރުމުގެ މަސައްކަތް ވަނީ ފަށައިފަ އެވެ. އެންމެ ގިނަ ފޯމް ހޯދާ ފަރާތަކަށް ބެންކޮކް ދެކޮޅު ޓިކެޓާއި ތިން ދުވަހު ހުރުން ދޭއިރު، ދެ ވަނަ އަދި ތިން ވަނަ އަށް ވެސް ބެންކޮކް ދަތުރެއް ދެއެވެ. މީގެ އިތުރުން 300 ފޯމް ހަމަކުރާ ކޮންމެ މީހަކަށް 7،500 ރުފިޔާ ހުށަހަޅާފައިވާ ކަމަށް މިކެމްޕޭނުގައި ހަރަކާތްތެރިވާ ޕީޕީއެމްގެ މެމްބަރަކު ބުންޏެވެ.

މި ކެމްޕޭނަށްޓަކައި މިނިސްޓަރުން ވެސް ވަނީ ދެ ގްރޫޕަކަށް ބަހާލައިފަ އެވެ. މިނިސްޓަރުންގެ އިތުރުން ކުންފުނިތަކުގެ ވެރިންނާއި ލީޑަރުންގެ ގޮތުގައި އެހެން ބައެއް މުވައްޒަފުން އެ ގްރޫޕްތަކުގައި ހަރަކާތްތެރިވެ އެވެ.

ޕީޕީއެމްއަށް މެމްބަރުން ވެއްދުމުގެ ވާދަވެރިކަން ސަރުކާރުގެ ކުންފުނިތަކުގެ ވެރިންގެ މެދުގައި ބޮޑުވެ، ބައެއް ކުންފުނިތަކުން މުވައްޒަފުންނަށް މަޖުބޫރުކުރަމުންދާ ކަމަށް ވެސް ސޯޝަލް މީޑިއާގައި ބައެއް ފަރާތްކުން ބުނެފައިވެ އެވެ.

މީގެ އިތުރުން ބައެއް ކުންފުނިތަކުގައި، 1،000 ފޯމް ހަމަކޮށްފި ނަމަ އެ މީހަކަށް ޕްރޮމޯޝަން ވެސް ދޭކަމަށް ވެސް ރާއްޖެ އެމްވީއަށް މައުލޫމާތު ދިން މީހަކު ބުންޏެވެ.

ޕީޕީއެމްގެ ސެކްރެޓަރީ ޖެނެރަލް ޑރ. ހަލީލް ފޯން ނުނަންގަވާތީ، މިކެމްޕޭނާ ގުޅޭ ގޮތުން އެ ޕާޓީގެ ރަސްމީ ބަހެއް ނުލިބެ އެވެ. 

ޕީޕީއެމް ދެ ފެކްޝަނަށް ބެހިފައިވާއިރު، އެ ޕާޓީގެ ބާނީ ކުރީގެ ރައީސް މައުމޫނު އަބްދުލް ގައްޔޫމާއި މިހާރުގެ ރައީސް މައުމޫން އަބްދުލް ގައްޔޫމާ ދެމެދު ގުޅުން ކެނޑި، ސިޔާސީ "ތަޅާފޮޅުން" ވަނީ ފެށިފަ އެވެ.  ކޯޓް މެދުވެރިކޮށް ޕާޓީ ހިންގުމުގެ ބާރު ރައީސް ޔާމީން ހޯއްދެވިއިރު، ރާއްޖޭގައި 30 އަހަރު ވެރިކަން ކުރެއްވި އަދި އެ ބޭފުޅެއްގެ ހިޔަނީގައި ރައީސް ޔާމީން ވެރިކަމަށް ވަޑައިގެންނެވި ރައީސް މައުމޫން ވަނީ، ރައީސް ޔާމީނަށް ކުރައްވާ ތާއިދު އަނބުރައި ގެންދަވައިފަ އެވެ.

އިދިކޮޅު ފަރާތްތަކާއި ބޭރުގެ ފަރާތްތަކުން ބުނާ ގޮތުގައި ރައީސް ޔާމީން ކުރަމުން ގެންދަނީ ޚުދުމުހްތާރު ވެރިކަމެކެވެ. ވެރިކަމަށް ވަޑައިގަތުމާއެކު 2018 ގެ ކެމްޕޭން ވެސް ރައީސް ޔާމީން ފެއްޓެވިއިރު، ހުރިހާ ވާދަވެރިން ވަނީ ޖަލަށް ލައިފަ އެވެ. ގާނޫނު އަސާސީއަށް ބަދަލު ގެނެސް، ކުރީގެ ރައީސް މައުމޫނަށާއި ޖުމްހޫރީ ޕާޓީގެ ލީޑަރު ގާސިމް އިބްރާހިމަށް ރިޔާސީ އިންތިހާބުގައި ވާދަނުކުރެއްވޭ ގޮތް ވެސް ވަނީ ހަދައިފަ އެވެ.

ރައީސް ޔާމީން ވެރިކަމަށް ކެމްޕޭން ކުރައްވަމުން ގެންދަވާއިރު، އެ މަނިކުފާނުގެ މައްޗަށް ތުހްމަތުކުރާ ހިޔާނާތުގެ މައްސަލަތައް ތަހްގީގެއް ނުކުރެ އެވެ.