އެމްޑީޕީގެ ޗެއާޕާސަންގެ އިންތިހާބުގައި ވޯޓުލަން ނިކުތުމަކީ، އެމްޑީޕީއަށް އޮތް ތާއީދު ދައްކާލުމަށް ކޮންމެހެން ކުރަންޖެހޭ ކަމެއް ކަމަށާއި، ޗެއާޕާސަންގެ މަޤާމަށް އިންތިހާބުވެއްޖެ ނަމަ ޕާޓީން ބޭނުންވާ އިސްލާހީ ބަދަލުތައް ގެންނެވުމަށް މަސައްކަތްކުރައްވާނެ ކަމަށް ޗެއާޕާސަންގެ މަޤާމަށް ވާދަކުރައްވާ ހަސަން ލަތީފް ވިދާޅުވެއްޖެ އެވެ.
އެމްޑީޕީގެ ޗެއާޕާސަންގެ އިންތިހާބާއި ގުޅޭ ގޮތުން ރާއްޖެޓީވީގެ "ފަލަސުރުހީ" ޕްރޮގްރާމްގައި ވާހަކަދައްކަވަމުން އެ މަޤާމަށް ކުރިމަތިލައްވާފައިވާ ހަމައެކަނި ކެންޑިޑޭޓް، ރައީސް މުހައްމަދު ނަޝީދުގެ ގާނޫނީ ވަކީލް، އަދި ކުރީގެ މިނިސްޓަރު ހަސަން ލަތީފް ވިދާޅުވީ، ޗެއާޕާސަންގެ އިންތިހާބަކީ ވަރަށް މުހިންމު އިންތިހާބެއް ކަމަށެވެ. އިންތިހާބުގައި ވޯޓުލުމަށް ހުރިހާ މެމްބަރުންވެސް ނުކުންނަން ޖެހެނީ ސަބަބަކީ ރައީސް އަބްދުﷲ ޔާމީނަށް އެމްޑީޕީގެ ސައިޒު ދައްކާލުން ކަމަށް އޭނާ ވިދާޅުވި އެވެ.
ޗެއާޕާސަންގެ މަޤާމަށް ކުރި ކެމްޕޭންގައި ގިނަ އަދަދެއްގެ އެމްޑީޕީ އާންމު މެމްބަރުންނާއި ބައްދަލުވެފައިވާ ކަމަށާއި، ކުރިއަށްވުރެ ބޮޑު ތާއީދެއް އަތޮޅު ތެރެއިން އެމްޑީޕީއަށް އެބައޮތް ކަމަށް ހަސަން ލަތީފް ވިދާޅުވި އެވެ. ޕާޓިއަށް އޮތް ތާއީދު އިތުރުވި ނަމަވެސް، ޕާޓީގެ ހަރަކާތްތައް ވަރަށް މަދުވެފައިވާކަމަށް ހަސަން ލަތީފް ވިދާޅުވި އެވެ. އޭނާ ވިދާޅުވީ އެކަން އެގޮތަށް ވަނީ ގިނަ ސަބަބުތަކެއް ހުރުމުން ކަމަށެވެ.
"އަޅުގަނޑަށް ފެނިގެންދިޔަ ހަރަކާތްތައް މަދުވެފައިވާ ތަން. ދެން އޭގެ ސަބަބުތައް އަޅުގަނޑުމެން އެންމެންނަށްވެސް އެބަ އެނގޭ، ސަރުކާރުގެ އަނިޔާވެރިކަމާއި، ސަރުކާރުން އެ ޖާގަ، ސިޔާސީ ހަރަކާތް ހިންގުމުގެ ޖާގަ ހަނިކޮށްފައިވާ މިންވަރުގެ ބޮޑުކަމުން. އެކަމުގެ ސަބަބުން ހަޤީޤަތުގައި އެމްޑީޕީގެ މެމްބަރުން ހަރަކާތްތެރިވެ ނޫޅެވެނީ،" ހަސަން ލަތީފް ވިދާޅުވި އެވެ.
ހަސަން ލަތީފް ވިދާޅުވީ، ސަރުކާރުދެކެ ފޫހިވާ ރައްޔިތުންގެ އަދަދު އިންތިހާއަށް އިތުރުވެފައިވާ ކަމަށެވެ. އެމްޑީޕީގެ ސަރުކާރުން ގެނައި ތަރައްޤީ، ގިނަ ރައްޔިތުން މިއަދު ގަބޫލުނުކުރާ ކަމަށް އޭނާ ވިދާޅުވި އެވެ.
ހަސަން ލަތީފް ވިދާޅުވީ ޕާޓީގެ ޗެއާޕާސަންގެ މަޤާމަށް ވަޑައިގެން، ޕާޓީގެ ގޮފިތައް އަލުން ހަރުދަނާކުރުމަށް މަސައްކަތްކުރާނެ ކަމަށެވެ. ސަރުކާރުން ހުރަސްތައްކުރިމަތިކުރި ނަމަވެސް ގޮފިތައް އެކުލަވާލާ، ކުރާ މަސައްކަތުގެ ސަބަބުން އެމްޑީޕީން ބޭނުންވާ ބަދަލު ގެނެވޭނެ ކަމަށް އޭނާ ވިދާޅުވި އެވެ. ހަސަން ލަތީފް ވިދާޅުވީ ރައްޔިތުން ބޭނުންވާ ބަދަލުތައް ގެނެސް، ޤައުމުގެ ކަންކަން އިސްލާހުކުރެވޭނެކަމަށްވެސް ގަބޫލުކުރައްވާކަމަށެވެ.
"އިރާދަކުރެއްވިޔާ އަޅުގަނޑުމެންނަށް އެކަންކުރެވޭނެ. އިންތިހާބުތައް ކާމިޔާބުކުރުމަށްވެސް ކުރަންޖެހޭ މުހިންމު މަސައްކަތެއް މިއީ. މި ދެންނެވި މަސައްކަތަކީ (ގޮފިތައް ހެދުމުގެ މަސައްކަތް). ރަށްރަށުގައި އެމްޑީޕީގެ ރޫހުއޮތުން، އެކަންކަން އަޅުގަނޑުމެންނަށް ކުރެވޭނެ އެނގޭތޯ." ހަސަން ލަތީފް ވިދާޅުވި އެވެ.
