ރައްޔިތުންގެ މަޖިލީހުގެ ވިލިނގިލީ ދާއިރާގެ މެމްބަރު ސައުދު ހުސެއިންގެ މައްޗަށް ދައުލަތުން އުފުލާފައިވާ ޓެރަރިޒަމްގެ ދައުވާ މަދަނީ މިންގަނޑުތަކުން ކުރިއަށް ގެންދެވެން ނެތް ކަމަށް ކަނޑައަޅައި، ކްރިމިނަލް ކޯޓުން އެ މައްސަލަ ބޭރުކޮށްލައިފިއެވެ.
ސައުދުގެ މައްޗަށް ޓެރަރިޒަމްގެ ދައުވާ އުފުލީ ހައި ކޯޓުގެ ފަނޑިޔާރު ޝުޖާއު އުސްމާނު އަވަހާރަކޮށްލަން ރޭވިކަމުގެ ތުހުމަތުގައެވެ. އެ މައްސަލާގައި ސައުދުގެ މައްޗަށް ކްރިމިނަލް ކޯޓުގައި ދައުވާ އުފުލީ މިދިޔަ އަހަރުގެ ޖުލައި މަހުގެ 31 ވަނަ ދުވަހުއެވެ.
އެ މައްސަލަ ކްރިމިނަލް ކޯޓުން ބޭރުކޮށްލި ސަބަބަަށް ގުޅޭ ގޮތުން ސައުދުގެ ގާނޫނީ ވަކީލު އަލީ ޝާހު ވިދާޅުވީ އެ ދައުވާއާ ގުޅޭ ގޮތުން ދިފާއުގައި ފާހަގަ ކުރި ކަންތައްތަކަށް ދައުލަތުން ޖަވާބުދާރީވެފައި ނުވާ ކަމަށެވެ. އަދި ސައުދުގެ ފަރާތުން ފާހަގަ ކުރި ކަންކަމަށް ބެލުމަށްފަހު، ޤާނޫނީ ގޮތުން އެ މައްސަލަ ކުރިއަށް ގެންދެވެން ނެތް ކަމަށް ކްރިމިނަލް ކޯޓުން ކަނޑައަޅާފައިވާ ކަމަށް ސައުދުގެ ވަކީލު ވިދާޅުވިއެވެ.
އެ މައްސަލަ ބޭރުކޮށްލުމާ ގުޅިގެން ސައުދު ކުރެއްވި ޓްވީޓުގައި ވިދާޅުވެފައި ވަނީ ދައުލަތުން އޭނާގެ މައްޗަށް އުފުލާފައިވަނީ އަސްލެއް ނެތް ސިޔާސީ ދައުވާއެއް ކަމުގައެވެ.
Alhamdhulillahi, RaeesYameen ge aniyāveri dhaulathun alhuganduge machah ufadhaafaivā asleh nei terrorism ge siyaasee dhauvaa, madhanee mingandun kuriah gendheven nei kamah kanda alhaa #CriminalCourt in massala ninma #Hukum kohffi.
— Saud Hussain MP (@SaudVillingili) November 25, 2018
ސައުދުގެ މައްޗަށް މި ދައުވާ ސާބިތުވިނަމަ 17 އަހަރާއި 20 އަހަރު ދުވަހުގެ ޖަލު ހުކުމެއް އަންނާނެ އެވެ.
