އދގެ އިންސާނީ ހައްޤުތަކާއި ބެހޭ ކައުންސިލްގެ ދެވަނަ ދައުރަކަށް ޤަޠަރު އިންތިޚާބުވުމާއި ގުޅިގެން އުފާކުރައްވާ ކަމަށް ކުރީގެ ރައީސް މުހައްމަދު ނަޝީދު ޓްވީޓް ކުރެއްވުމުން، އެޓްވީޓާއި މެދު ފުންކޮށް ވިސްނާލެވުނެވެ. ރައީސް ޔާމީންގެ ވެރިކަމުގައި ރާއްޖެ އެކަހެރިވަމުންދާ ކަމަށް ރައީސް ނަޝީދު ފާހަގަކުރެއްވިއިރު، ޤަޠަރު، ހިއުމަން ރައިޓްސް ކައުންސިލަށް ހޮވުމާއި ދޭތެރޭ ވިސްނާލެވުނެވެ.

ހިއުމަން ރައިޓްސް ކައުންސިލުގައި އޭޝިއާ ޕެސިފިކް ސަރަހައްދަށް ކަނޑައަޅާފައިވާ 13 ގޮނޑީގެ ތެރެއިން މިއަހަރުގެ ނިޔަލަށް ނިމޭ ދައުރުގައި 4 ގޮނޑިއެއް ހުސްވެއެވެ. މިގޮނޑިތަކަށް ރާއްޖެ ހިމެނޭ ގޮތަށް 6 ޤައުމަކުން ކުރިމަތިލިއެވެ. އެހެން ނަމަވެސް ގޮނޑިއަށް ހޮވޭ ވަރަށް ތާޢީދު ނެތްކަން އެނގުމުން ދިވެހި ސަރުކާރުން މި އިންތިޚާބުގައި ވާދަނުކުރުމަށް ނިންމިއެވެ. ބާކީ 5 ޤައުމުން ވާދަކުރިއިރު ހުސްވެފައި ވަނީ 4 ގޮނޑިއެވެ. ކުރިމަތިލާފައިވާ 5 ޤައުމުގެ ތެރޭގައި ދެވަނަ ދައުރަކަށް ކުރިމަތިލި ޤަޠަރު ހިމެނެއެވެ.

ޤަޠަރަކީ ދުނިޔޭގެ އެންމެ މުއްސަނދި ޤައުމެވެ. ޢަރަބި ޤައުމުތަކުގެ ޝާހީ ޢާއިލާ ތަކުގެތެރޭގައި ތެރޭގައި އުފެދުނު ޒާތީ މައްސަލައެއްގައި ސަޢޫދީ ޝާހީ އާއިލާ އިސްވެ އޮވެ، ޓެރަރިޒަމަށް ހިތްވަރުދޭކަމަށް ބުނެ ޤަޠަރާއި ގުޅުން ކަނޑާލިއެވެ. ސައޫދީން ގުޅުން ކަނޑާލިތަނާ މާގިނައިރުތަކެއް ނުވެ، ވީނުވީއެއް ނޭނގިތިބެ ޤަޠަރު ވަރުގެ ނުބައި ނުލަފާ، ޓެރަރިޒަމަށް ވާގިވެރިވާ ޤައުމެއް ނެތްކަމަށް ހަދާ، ބަޔާންތައް ނެރެ، ދިވެހި ރާއްޖެއިންވެސް ޤަޠަރާއި ގުޅުން ކަނޑާލިއެވެ. އެހެން ނަމަވެސް މިއީ ޒާތީ މައްސަލައެއްކަން އެނގޭތީވެ، ސައުދީގެ ގޮނޑިކޮއްކޮ ދެތިން ޤައުމެއް ފިޔަވައި އެހެން ޤައުމަކުން ޤަޠަރާއި ގުޅުން ކަނޑާލާފައެއް ނުވެއެވެ.

ތިމާމެނަށް ވުރެ އިސްތިޤްލާލަށް ކަމޭހިތައި، އެއަށް އިހްތިރާމްކޮށް، ދާޚިލީ މިނިވަންކަން ދަމަހައްޓާ ބަޔަކު ނެތްކަމަށް ހެދޭ ދިވެހިރާއްޖެއިން ޤަޠަރާއި ގުޅުން ކަނޑާލިއިރު ކެބިނެޓް މެމްބަރުންނަށް މިވީ ކިހިނެއްކަން އެނގުނަސް އެއީ ނަސީބެކެވެ. ދިވެހި މީޑިއާއަށް އެކަން އެނގުމުގެ ކުރިން ސައޫދީ މީޑިއާއަށް ދިވެހިރާއްޖެއިން ޤަޠަރާއިއެކު ގުޅުން ކަނޑާލިކަން އެނގުނެވެ.

ދުނިޔޭގެ ޤައުމުތަކުން ޤަޠަރަކީ ޓެރަރިޒަމަށް ވާގިވެރިވާ ޤައުމެއް ނޫންކަން ބަލައިގަންނަ ކަމުގެ ހެކި އދގެ އިންސާނީ ހައްޤުތަކާއި ބެހޭ ކައުންސިލުން އެފެނުނީއެވެ. 155 ޤައުމުގެ ވޯޓާއިއެކު 2ވަނަ ދައުރަކަށް ޤަޠަރު އެހޮވުނީއެވެ. ގައިމު އެހާ ނުބައި ޤައުމެއްނަމަ ޤަޠަރު ކަޓުވާލާފައި، އެކައުންސިލަށް މެލޭޝިއާ ހޮވަންވީނޫންތޯއެވެ؟

އިސްތިޤްލާލޭ ދާޚިލީ މިނިވަންކަމޭ ކިޔައި އަދިވެސް ޕީޕީއެމްގެ ސަރުކާރުން އަނގަ ގަދަ ކުރާށެވެ. ތާޢީދު ނެތިގެން ރާއްޖެއިން ނަން އަނބުރާ ގެންދިޔަ އިރު، ޓެރަރިޒަމަށް ވާގިވެރިވާ ކަމަށް ބުނެ ދިވެހިން ގުޅުން ކަނޑާލި ޤަޠަރު އެއޮތީ އިންސާނީ ހައްޤުތައް ޙިމާޔަތް ކުރުމަށް މަސައްކަތްކުރާ ބައިނަލްއަޤްވާމީ އެންމެ ބޮޑު ޖަމާޢަތުގެ އެންމެ ބާރުގަދަ ކައުންސިލްގެ މެމްބަރުކަން، ދެވަނަ ފަހަރަށް، 155 ޤައުމުގެ ތާޢީދާއިއެކު ދިފާޢުކޮށްފައެވެ. ދެން އަތް ޖަހާށެވެ.