މާލެ ސިޓީ ކައުންސިލް ގައި މަސައްކަތް ކުރާ ބިދޭސީންގެ ދިރިއުޅުމުގެ ހާލަތަށް ބަދަލުތައް ގެނައުމަށް ކައުންސިލުން ފެށި މަސައްކަތް ކާމިޔާބުކަމާއި އެކީ ނިންމާލައިފިއެވެ.

ސިޓީ ކައުންސިލްގެ ދަށުގައި 230 ބިދޭސީން މަސައްކަތް ކުރެއެވެ. މާލޭގެ ހާބަރު ސެކްޝަން ބެލެހެއްޓުމާއި، މަގު ހެދުމުގެ މަސައްކަތްތަކުގެ އިތުރުން ޕާކްތައް ބެލެހެއްޓުމަށްވެސް ސިޓީ ކައުންސިލްގެ ބިދޭސީން އަންނަނީ ހަރަކާތްތެރިވަމުންނެވެ. އެ ބިދޭސީންގެ ދިރިއުޅުމުގެ ހާލަތަށް ބަދަލު ގެނައުމަށް ކައުންސިލުން މަސައްކަތް ކުރަމުން އަންނަތާ ދުވަސްތަކެއް ވެއްޖެއެވެ.

އަންގާރަ ދުވަހު ''ރާއްޖެ.އެމްވީ'' އަށް ދެއްވި ހާއްސަ އިންޓަވިއުއެއް ގައި މާލެ ސިޓީ ކައުންސިލްގެ މޭޔަރު ޝިފާ މުހައްމަދު ވިދާޅުވީ، ބިދޭސީންގެ ހާލަތު މީގެ ކުރިންވެސް ވަރަށް ރަނގަޅަށް ދެނެގަނެވިފައިވާ ކަމަށާއި، ކައުންސިލާއި ހަވާލުވެގެން އެންމެ ފުރަތަމަ މުވައްޒަފުންނާ ބައްދަލު ކުރި ދުވަހު ވެސް ބިދޭސީ މުވައްޒަފުން ބޭނުންވީ އެ މީހުން ދިރިއުޅޭ ތަންތަނަށް މިހާރަށްވުރެ ރަނގަޅު ގޮތެއް ހޯދައި ދިނުމަށް ކަމަށެވެ.

އެކަމަކު ފާއިތުވެ ދިޔަ ދުވަސްތަކުގައި ކައުންސިލްގެ ބަޖެޓުގައި ހަރަދު ކުރެވޭ ވަރަށް ފައިސާ ނެތުމުން އެކަން އޮތީ ކުރިޔަށް ނުގެންދެވި ކަމަށް ޝިފާ ވިދާޅުވިއެވެ. ނަމަވެސް ސިޓީ ކައުންސިލުން ވަނީ ބިދޭސީ މުވައްޒަފުންގެ ކަންބޮޑުވުންތައް ރައީސް އިބްރާހިމް މުހައްމަދު ސޯލިހުގެ ސަމާލު ކަމަށް ގެންނަވާފައެވެ.

ކޮވިޑް-19 ގެ ހާލަތު ރާއްޖެ އަށް ދިމާވުމާއި އެކު ބިދޭސީންނަކީ އޭގެ ސަބަބުން އެންމެ ބޮޑަށް ހާލުގައި ޖެހޭނެ ބައެއްކަން އެނގިގެން އެ މީހުންގެ ދިރިއުޅުމުގެ ހާލަތު ބަދަލު ކުރުމުގެ މަސައްކަތް އިކޮނޮމިކް މިނިސްޓްރީއާ ގުޅިގެން ސިޓީ ކައުންސިލުން މަސައްކަތްތަކެއް ފެށިކަން ޝިފާ ފާހަގަ ކުރެއްވިއެވެ.

މި ދައުރުގެ ތެރޭގައި ކުރެވުނު ކަންތައްތަކުގެ ލިސްޓުގައި އެންމެ ބޮޑު ކަމެއްގެ ގޮތުގައ ޝިފާ ފާހަގަކުރެއްވީ، ކައުންސިލުގެ ބެލުމުގެ ދަށުގައި ހުރި ތަންތަން އެއަށްވުރެ ފެންވަރު ރަނގަޅުކޮށް ބިދޭސީންނަށް ތިބެވޭނެ އިންތިޒާމް ހަމަޖެއްސުމެވެ. އެމީހުންގެ ތެރެއިން ގިނަ މީހުން ދިރިއުޅެމުން އައީ ތައިސޭ ކޮށީގެ އިތުރުން ތައިސޭ ކޮއްޓާއި ނީލަން ފިހާރައާއި ޖެހިގެން ހުންނަ ޖާގައިގައެވެ. އެތަނުގައި ތިބި ބިދޭސީން ވަނީ މިހާރު އައޖީއެމްއެޗް ބިތް ދޮށުގައި އޮންނަ ބްލޮކްގެ އިތުރުން އިމާދުއްދީން ބްލޮކް އަށް ބަދަލު ކޮށްފައެވެ. އެ ތަންތަނަށް އެ މީހުން ބަދަލު ކުރީ އިތުރަށް މަރާމާތުކޮށް މީހުންނަށް ހަމަޖެހިލައިގެން ތިބެވޭނެ އިންތިޒާމްތައް ހަމަޖައްސާފައެވެ.

އޭނާ ވިދާޅުވީ، ބިދޭސީން ދިރިއުޅޭ ތަންތަނުގެ ފެންވަރުގެ އިތުރުން އެ މީހުން އަމަލު ކުރަން ޖެހޭ އުސޫލެއް ވެސް ގާއިމްކޮށް ފެންނަ ގޮތަށް ނޯޓިސް ހަރުކޮށްފައިވާ ކަމަށެވެ.

ޝިފާ ވިދާޅުވާ ގޮތުގައި އެ ކަންތައްތައް ކުރުމުގެ މައިގަނޑު މަގްސަދަކީ ރައްޔިތުން ގަބޫލު ކުރާ ފެންވަރަށް ބިދޭސީން ކުރާ މަސައްކަތްތައް ވެސް ގެންދިޔުމެވެ.

އެ އަޒުމުގައި ސިޓީ ކައުންސިލުން މަސައްކަތް ކުރަމުން ދާއިރު ކުރިޔަށް އޮތް ތަނުގައި ބިދޭސީންނަށް އަމާޒުކޮށްގެން ތަމްރީނު ޕްރޮގްރާމްތައް ވެސް ހިންގުމަށް ވަނީ ހަމަޖެހިފައެވެ. އެ ޕްރޮގްރާމްގެ ތެރެއިން ސެކިއުރިޓީ ބަލަހައްޓަން 20 ބިދޭސީއަކަށް ތަމްރީނު ވަނީ މިހާރު ދީފައެވެ.

ކައުންސިލުން ބުނީ، ބިދޭސީން ގެންގުޅޭ ކުންފުނިތަކުން ވެސް އިސްނަގައިގެން އެ މީހުންގެ ހާލަތަށް ބަދަލު ގެނައުމަށް މަސައްކަތް ކުރަން ޖެހެއެވެ.