ކ. މާލެ
|
29 މެއި 2020 | ހުކުރު 18:58
ސްޕެނިޝް ލީގުގައި އެއިބާ އާއި ބާސެލޯނާ ބައްދަލުކުރި މެޗުގެ ތެރެއިން
ސްޕެނިޝް ލީގުގައި އެއިބާ އާއި ބާސެލޯނާ ބައްދަލުކުރި މެޗުގެ ތެރެއިން
ގެޓީ އިމޭޖަސް
ސްޕެނިޝް ލީގު އަލުން ފެށުން
ޖޫން 11 ގައި ސްޕެނިޝް ލީގު ފަށަން ނިންމައިފި
 
އަންނަ ސީޒަން ސެޕްޓެމްބަރު 12 ގައި ފަށަން ވަނީ ނިންމާފައި
 
ޖޫން މަހުގެ އަށްވަނަ ދުވަހުން ފެށިގެން ލީގު ފެށުމުގެ ހުއްދަ ސްޕެއިންގެ ސަރުކާރުން ވަނީ ދިފައި

ކޮރޯނާވައިރަސް (ކޮވިޑް-19) އާ ގުޅިގެން މެދުކަނޑާލާފައިވާ ސްޕެނިޝް ލީގު ޖޫން މަހުގެ 11 ވަނަ ދުވަހު ފަށަން ނިންމާފައިވާ ކަމަށް ލަލީގާގެ ރައީސް ހާވިއޭ ޓެބާސް ވިދާޅުވެއްޖެ އެވެ.

ލީގު އަލުން ފަށާނެ ތާރީޚެއް ޓެބާސް އިއުލާން ކުރެއްވިއިރު، މީގެ ކުރިން ގައުމާ މުޚާތަބު ކުރައްވަމުން ސްޕެއިންގެ ބޮޑު ވަޒީރު ޕެޑްރޯ ސަންޗޭޒް ވަނީ ޖޫން މަހުގެ އަށްވަނަ ދުވަހުން ފެށިގެން ސްޕެނިޝް ލީގުގެ ކުޅުންވެސް ކުރިއަށް ގެންދެވޭނެ ކަމަށް ވިދާޅުވެފައެވެ.

އެއާއެކު ސްޕެނިޝް ލީގު އަލުން ފެށުމަށް މަޝްވަރާތައް ކުރިއަށް ގެންދިޔައިރު، ޓެބާސް ވިދާޅުވީ ޖޫން މަހުގެ 11 ވަނަ ދުވަހު ލީގު އަލުން ފަށަން މިހާރު ނިންމާފައިވާ ކަމަށެވެ. އެގޮތުން ލީގު އަލުން ފަށާނީ ދަނޑަށް ސަޕޯޓަރުން ނުވައްދައި މެޗުތައް ކުޅޭ ގޮތަށް ކަމަށާއި، މި ސީޒަން ނިންމާ އަންނަ ސީޒަން ސެޕްޓެމްބަރު މަހުގެ 12 ވަނަ ދުވަހު ފަށާނެ ކަމަށްވެސް ވިދާޅުވި އެވެ.

ކޮވިޑް-19 އާ ގުޅިގެން މިދިޔަ މާޗު މަހު ސްޕެނިޝް ލީގުގެ ކުޅުން ހުއްޓާލިއިރު، މިހާރު ވަނީ 14 ކުޅުންތެރިން އެކުގައި ތަމްރީނުތައް ހެދުމުގެ ހުއްދަ ކްލަބުތަކަށް ދީފައެވެ.

ސްޕެނިޝް ލީގު އަލުން ފަށަން ތައްޔާރު ވަމުންދާއިރު، ސްޕެއިންގެ ފުރަތަމަ ޑިވިޝަނާއި ދެވަނަ ޑިވިޝަނުގެ ހުރިހާ ކުޅުންތެރިން ވަނީ ކޮވިޑް-19 ށް ޓެސްޓު ކޮށްފަ އެވެ. އެއާއެކު ދެ ޑިވިޝަނުން މީގެ ކުރިން ފަސް ކުޅުންތެރިއަކު ވަނީ ކޮވިޑް-19 ށް ޕޮޒިޓިވްވެފަ އެވެ.

ޖޫން 11 ގައި ސްޕެނިޝް ލީގު އަލުން ފަށާއިރު، އެއްވަނައިގައި އޮތް ބާސެލޯނާ އާއި ދެވަނައިގައި އޮތް ރެއާލް މެޑްރިޑާއި ދެމެދު އޮތީ ދެ ޕޮއިންޓުގެ ފަރަގެކެވެ. ބާސާ އަށް 27 މެޗުން 58 ޕޮއިންޓު ލިބިފައިވާއިރު، ރެއާލަށް ވަނީ 27 މެޗުން 56 ޕޮއިންޓު ލިބިފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުސައިން ފަރިޔާޒް
0%
0%
0%
0%
0%
0%
ކޮމެންޓް