ޖޫން މަހުގެ 1 ވަނަ ދުވަހު އިނގިރޭސިވިލާތުގެ ސްކޫލްތައް ހުޅުވުމަށް ނިންމާފައިވާ ކަމަށް ބޮޑުވަޒީރު ބޯރިސް ޖޯންސަން ވިދާޅުވެއްޖެ އެވެ.

އާދީއްތަ ދުވަހުގެ ނޫސްވެރިންގެ ބައްދަލުވުމުގައި ވާހަކަދައްކަވަމުން ބޯރިސް ވިދާޅުވީ ފުރަތަމަ ސްކޫލްތަކުގައި ކިޔެވާދޭން ފަށާނީ ޕްރައިމަރީ ގްރޭޑްތަކުގެ ދަރިވަރުންނަށް ކަމަށެވެ.

އަދި ޖޫން މަހުގެ 15 ވަނަ ދުވަހުން ފެށިގެން ސެކަންޑްރީ ސްކޫލްތަކުން ގްރޭޑް 11 އަދި 12 ގެ ދަރިވަރުންނަށް އިމްތިހާނުތަކަށް ތައްޔާރުވުމަށް އެހީތެރިކަން ފޯރުކޮށްދޭނެކަމަށެވެ.

މީގެ އިތުރުން، ސްކޫލްތައް ހުޅުވާލުމުގެ ކުރިން، ކޮންމެ ސްކޫލަކަށް ވެސް ގައިޑްލައިންތަކެއް ފޯރުކޮށްދެވޭނެ ކަމަށް ބޮރިސް ވިދާޅުވި އެވެ. އެގޮތުން ކްލާސްރޫމްތަކުގައި ކިޔަވައިދޭ ކުދިންގެ އަދަދު މަދުކުރުމާއި، ބެލެނިވެރިން ކުދިން ބަލާ އަންނަ ގަޑިތައް ކަނޑައެޅުމަށް މި ގައިޑްލައިންގައި ހިމެނޭނެ އެވެ.

ދަރިވަރުންނާއި ސްކޫލް މުވައްޒަފުންގެ ތެރެއިން ބައްޔަށް ޝައްކު ކުރެވޭ އަލާމާތެއް ހުރި ކަމުގައި ވާނަމަ ޓެސްޓު ކުރެވޭނެ އިންތިޒާމް ވެސް ހަމަޖައްސަވާނެ ކަމަށް ބޯރިސް ވިދާޅުވި އެވެ.