ފެބްރުއަރީ މަހުގެ ދެވަނަ ހަފްތާގެ ނިޔަލަށް، ދިވެހި ދައުލަތުގެ ހިންގުމުގެ ހަރަދު (ރިކަރަންޓް ހަރަދު) 1،645.8 ބިލިއަން ރުފިޔާއަށް އަރާފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ފިނޭންސުން އާންމުކޮށްފައިވާ އަދަދުތަކަށް ބަލާއިރު، ރިކަރަންޓް ހަރަދުގެ ގޮތުގައި ދައުލަތުން ހަރަދުކުރި ފައިސާގެ ތެރެއިން ބޮޑު ބައެއް ހަރަދުކޮށްފައިވަނީ މުސާރަ އާއި ޕެންޝަން ފައިސާގެ ގޮތުގައެވެ. އެގޮތުން 831.4 މިލިއަން ރުފިޔާ ދައުލަތުން ވަނީ ހަރަދުކޮށްފައެވެ. މިއީ 2019 ވަނަ އަހަރުގެ މި މުއްދަތާ އަޅާކިޔާއިރު، 39.1 މިލިއަން ރުފިޔާ އިތުރު އަދަދެކެވެ.

ރިކަރަންޓް ހަރަދުގެ ގޮތުގައި ދެން ހަރަދުކުރި ފައިސާއަކީ އެޑްމިނިސްޓްރޭޓިވް އަދި އޮޕަރޭޝަނަލް ހަރަދަށް ކޮށްފައިވާ 813.7 މިލިއަން ރުފިޔާއެވެ. މިއީ 2019 ވަނަ އަހަރުގެ މި މުއްދަތާ އަޅާބަލާއިރު، 200.1 މިލިއަން ރުފިޔާ އިތުރު އަދަދެކެވެ.

ދައުލަތުގެ ކެޕިޓަލް ހަރަދުތަކަށް ބަލާއިރު، ޖުމްލަ 903 މިލިއަން ރުފިޔާ ވަނީ މިހާތަނަށް ހަރަދުކޮށްފައެވެ. މިއީ 2019 ވަނަ އަހަރުގެ މި މުއްދަތާ އަޅާކިޔާއިރު، 381.8 މިލިއަން ރުފިޔާ އިތުރު އަދަދެކެވެ.

އަހަރުގެ މިހާތަނަށް ދައުލަތަށް އާމްދަނީގެ ގޮތުގައި ލިބިފައިވަނީ، 2،657.7 ބިލިއަން ރުފިޔާއެވެ. ޖުމްލަ ހަރަދަކީ 2،548.8 ބިލިއަން ރުފިޔާއެވެ. އެހެންކަމުން މިހާތަނަށް ލިބުނު އާމްދަނީގެ ތެރެއިން ހަރަދަށް ކަނޑާފައި ބާކީވެފައިވަނީ 33.6 މިލިއަން ރުފިޔާއެވެ.