އަހަރުތަކެއްގެ ދިގުދެމުމަކަށްފަހު، އިނގިރޭސި ރައްޔިތުންގެ ނިންމުމާ އެއްގޮތަށް އިނގިރޭސިވިލާތް ޔޫރަޕުގެ އިއްތިހާދުން ވަކިވެއްޖެއެވެ.
އީޔޫއިން ވަކިވާން އިނގިރޭސި ރައްޔިތުން ވޯޓު ދިންތާ ތިން އަހަރު ފަހުން އިނގިރޭސިވިލާތް އީޔޫއިން ވަކިވެފައިވަނީ، ހުކުރު ދުވަހުގެ ދަންވަރު 12:00 ގައެވެ. މިކަމާއި އެގައުމުގެ އެއް ބަޔަކު އުފާފާޅުކޮށްފައިވާއިރު، އަނެއް ބަޔަކު ވަނީ ހިތްހަމަނުޖެހުން ފާޅުކޮށް އިހުތިޖާޖުކޮށްފަ އެވެ.
މިއީ ދާދި ފަހުން އިނގިރޭސިވިލާތުގެ ބޮޑުވަޒީރުގެ މަގާމަށް ވަޑައިގެންނެވީ ބޯރިސް ޖޯންސަންގެ އިންތިހާބީ ވައުދެކެވެ. އަދި މިކަމާއި ގުޅޭގޮތުން ފޭސްބުކްގައި ކުރެއްވި ޕޯސްޓެއްގައި ބޯރިސް ވިދާޅުވީ، މިއީ ނިމުމެއް ނޫން ކަމަށާއި، މިއީ ފެށުން ކަމަށެވެ.
އިނގިރޭސި ވިލާތް އީޔުން ވަކިންވުމަށްފަހު، 11 މަހުގެ ޓްރާންޒިޝަން މުއްދަތެއް ފެށޭނެއެވެ. އަދި މި މުއްދަތުގެ ތެރޭގައި އިނގިރޭސިވިލާތުން ތަބާވާނީ އީޔޫގެ ގަވައިދުތަކާއި އުސޫލުތަކަށެވެ. އިތުރަށް ކުރިޔަށްދާނެ ގޮތަކާއި މެދު މަޝްވަރާތައް ކުރުމަށް ވަނީ ހަމަޖެހިފައެވެ.
