ނޮކޫ މޯލްޑިވްސް އައިލެންޑް ރިސޯޓަށް ފަތުރުވެރިން ގޮވައިގެން ދަތުރުކުރަމުންދިޔަ ލޯންޗެއް ބަންޑުން ޖަހާލައި އޭގެން ދަތުރުކުރި މީހަކު މަރުވެއްޖެއެވެ.

އެކަމާ ގުޅޭގޮތުން ފުލުހުން ބުނީ، ލޯންޗު ބަންޑުން ޖަހާލި ކަމުގެ ރިޕޯޓް ފުލުހުންނަށް ލިބިފައިވަނީ ބުދަ ދުވަހުގެ ހަވީރު 17:48 ގައި ކަމަށާއި، ލޯންޗު ބަންޑުން ޖަހާލާފައިވަނީ އެ ރިސޯޓުގެ ނެރުމައްޗަށް ކަމަށެވެ. އަދި ލޯންޗުން އޭރު ދަތުރުކުރީ 7 މީހުން ކަމަށާއި، މަރުވެފައިވަނީ ލޯންޗުން ދަތުރުކުރި 51 އަހަރުގެ ދިވެހި ފިރިހެނެއް ކަމަށެވެ. އަދި އޭނާ މަރުވެފައިވާކަމުގެ މައުލޫމާތު ބުދަ ދުވަހުގެ ރޭ 19:50 ގައި ލިބިފައިވާ ކަމަށް ފުލުހުން ބުނެއެވެ.

ފުލުހުން ބުނީ 51 އަހަރުގެ މީހާއަށް ލޮނު ބޮވުމުގެ ހޭނާރާތީ އޭނާ ނ މަނަދޫ ހެލްތު ސެންޓަރަށްވެސް ގެންދިޔަ ކަމަށެވެ. އަދި އޭނާއަކީ ރިސޯޓުގައި މަސައްކަތެއް ކުރަން ދިޔަ މީހެއްކަމަށްވެސް ބުނެފައިވެއެވެ.

މި ހާދިސާގެ މައުލޫމާތު ލިބުމާއެކު ރިސޯޓުގެ ފަރާތުން ޑިންގީއެއް އެ ސަރަޙައްދަށް ގޮސް ކަނޑުވި މީހުން ސަލާމަތް ކޮށްފައިވާކަމަށް ފުލުހުން ބުނެއެވެ.