ދުނިޔޭގެ ބާރުތަކާއި އެކު އީރާނުން ވެފައިވާ ނިއްކްލިއަރ އެއްބަސްވުމާއި ޚިލާފުވެފައި ނުވާނެކަމަށް އީރާނު ސަރުކާރުން ބުނެފިއެވެ.

އީރާނުން ނިއުކްލިއަރ އެއްބަސްވުމާއި ޚިލާފުވެފައިވާކަމަށާއި، އޭގައި އެއްބަސްވެފައިވާ ކަންކަން ތަންފީޒުކުރަމުން ނުދާކަމަށް ބުނެ ހުޅަނގުގެ ޤައުމުތަކުން އީރާނަށް ކިޔަމުންދާ ފާޑުކިޔުންތަކަށް ރައްދުދެއްވާ، އެޤައުމުގެ ޚާރިޖިއްޔާގެ ތަރުޖަމާނު އައްބާސް މުސާވީ ވިދާޅުވެފައިވަނީ އެޤައުމުތަކުން ފަތުރަމުން އެދަނީ ޙަޤީޤަތާއި ޚިލާފު ވާހަކަތަކެއް ކަމަށެވެ. އައްބާސް ވިދާޅުވީ، ވިލާތު އިއްތިހާދު މެދުވެރިވެ 2015 ވަނަ އަހަރު އީރާނުން ދުނިޔޭގެ ނުފޫޒު ގަދަ ނުވަތަ ބާރުވެރި ޤައުމުތަކާއެކު ވެފައިވާ އެއްބަސްވުމާއި އެޤައުމުން ޚިލާފު ނުވާކަމަށާއި، އަދިވެސް އެއާއި އެއްގޮތައް ޢަމަލުކުރަމުންދާކަމަށެވެ. ވިލާތު އިއްތިހާދުގެ ޤައުމުތަކަށް ފާޑު ވިދާޅުވެ މުސާވީ ވިދާޅުވީ އެއްބަސްވުމުގައި ވާ ގޮތައް އެޤައުމުތަކުން ޢަމަލު ނުކުރާ ކަމަށެވެ.

މުސާވީ ވިދާޅުވީ، އީރާނުގެ ނިއްކިލިއަރ ޕްރޮގުރާމުގެ މަސައްކަތް އިތުރަށް ދަށް ކުރާނީ، ވިލާތު ޤައުމުތަކުން އެޤައުމާއި މެދު ގެންގުޅޭ ސިޔާސަތުޔަކުގެ މައްޗަށް ބިނާކޮށްކަމަށެވެ. އަދި އެކަން ވާންޖެހޭނީ އޭގެ ޒާތުގައި އީރާނަށް ފައިދާ ހުރި، އަދި އެއްބަސްވުމެއްގެ ތެރެއިން ކަށަވަރުކުރެވޭ ފަދަ ގޮތަކައް ކަމަށް މުސާވީ ވިދާޅުވިއެވެ.

މުސާވީ މިހެން ވިދާޅުވެފައި މިވަނީ އީރާނުގެ ނިއްކްލިއަރ އެއްބަސްވުމަށް ފުރިހަމަޔަށް އިހުތިރާމުކުުރުމަށް ހުޅަނގުގެ ޤައުމުތަކުން އިރާނަށް ގޮވާލާފައި ވަނިކޮށްނެވެ.

އެމެރިކާ އާއި އިތުރު ހަތް ޤައުމަކުން އިރާނާ އެކު 2015 ވަނަ އަހަރު ހަދާފައިވާ ނިއުކުލިއަރ އެއްބަސްވުމަކީ އިރާނުގެ ނިއުކްލިއަރ ޕްރޮގުރާމު ކޮންޓްރޯލް ކުރުމުގެ ގޮތުން އެކުލަވާފައިވާ އެއްބަސްވުމެކެވެ. އެހެންނަމަވެސް 2018 ވަނަ އަހަރު އެމެރިކާގެ މިހާރުގެ ރައީސް ޑޮނާލްޑް ޓްރަމްޕަ ވަނީ އެއްބަސްވުމުން ވަކިވެފައެވެ.

ވިލާތު އިއްތިޙާދު މެދުވެރިވެ އެކުލަވާލި މި އެއްބަސްވުމުގައި ހިމެނޭ ޤައުމުތަކަކީ ފަރަންސޭސި ވިލާތާއި، ޖަރުމަން ވިލާތާއި، އިނގިރޭސި ވިލާތާއި، ރަޝިޔާގެ އިތުރުން ޗައިނާއެވެ. 2015 ވަނަ އަހަރުގެ އޮކްޓޯބަރުމަހުގެ 18 ވަނަ ދުވަހު އެކުލަވާލި މިއެއްބަސްވުމަށް ޢަމަލުކުރަން ފަށާފައިވަނީ 2016 ވަނަ އަހަރުގެ ޖެނުއަރީ މަހުގެ 16 ވަނަ ދުވަހުއެވެ.