ސިވިލް ސަރވިސް ކޮމިޝަން (ސީއެސްސީ)ގެ މަސައްކަތްތައް މާބޮޑަށް ލަސްވާތީ ފޮރިން މިނިސްޓަރު ޢަބްދުﷲ ޝާހިދު ނުރުހުން ފާޅުކުރައްވައިފިއެވެ.
ހޯމަ ދުވަހު ފޮރިން މިނިސްޓްރީއަށް ޕަރމަނަންޓް ސެކްރެޓަރީ ޢައްޔަނުކުރުމަށް ބޭއްވި ރަސްމިއްޔާތުގައި މިނިސްޓަރު ޝާހިދު ވިދާޅުވީ ސީއެސްސީގެ މަސައްކަތްތައް ވަރަށް ބޮޑަށް ލަސްކަން ފާހަގަކުރެވިފައިވާ ކަމަށާއި، މުޅި ދައުލަތަށް އެކަމުގެ ނޭދެވޭ އަސަރުކުރާ ކަމަށެވެ. އަދި ކަންކަން ލަސްވެގެން ދާދިއުމާ ދޭތެރޭގައި މިނިސްޓަރު ވަނީ ވަރަށް ބޮޑަށް ކަންބޮޑުވުންފާޅު ކުރައްވާފައެވެ.
މިނިސްޓަރު ޝާހިދު ވިދާޅުވީ ޕަރމަނަންޓް ސެކްރެޓަރީ މަޤާމު ހުސްވުމަށްފަހު އަލުން އައު ބޭފުޅަކު ޢައްޔަނު ކުރުމަށް ތިން މަހާ ބާރަ ދުވަސްވެފައިވާ ކަމަށާއި، މިއީ ކަންވެގެންވާނެ ގޮތް ނޫން ކަމަށެވެ. މިނިސްޓަރު ވިދާޅުވީ ސީއެސްސީ ނަމޫނާ ކޮމިޝަނަކަށް ވާންޖެހޭކަމަށާއި، މުއައްޒަފުންނަށް ނަމޫނާ ދައްކާ ބައެއްކަމުގައިވާން ޖެހޭ ކަމަށެވެ. ނަމަވެސް އޭގެ ބަދަލުގައި ފެނިގެންދަނީ ކަންކަން ލަސްވެ ކަންކަން ދިގުލައި ޤަބޫލުކުރަން ދަތި މިންވަރަށް ގޮސްފައިވާ މަންޒަރުކަމަށް މިނިސްޓަރު ވިދާޅުވިއެވެ.
މީގެ އިތުރުން މިނިސްޓަރު ޝާހިދު ވިދާޅުވީ ސީއެސްސީ އާއި ފޮރިން މިނިސްޓްރީއާ ދޭތެރޭގައި މަޝްވަރާކުރެވި، މިނިސްޓްރީގެ މުއައްޒަފުންނަށް ބޭނުންވާ މަޤާމުގެ ކުރިއެރުމާއި ކަންތައްތައް ހަމަޖެއްސުމަށް އިޢުލާން ކުރެވި އެއިޢުލާން ބާޠިލުވެ، އަލުން އިއުލާން ކުރުމަށް ވާހަކަ ދެކެވެމުންދާތާ ޖުމުލަ މިހާރު 28 ދުވަސްވެފައިވާ ކަމަށެވެ. އަދި މިއީ ޤަބޫލުކުރެވޭނެ ކަމެއް ނޫން ކަމަށް މިނިސްޓަރު ވިދާޅުވިއެވެ.
ހަމައެއާއެކު ކަންކަން ލަސްވެގެން ދާދިއުމާ ދޭތެރޭގައި އަޅުގަނޑު ކަންބޮޑުވާ ވާހަކަ ދަންނަވަން. ޕާމަނަންޓް ސެކްރެޓަރީގެ މަގާމު ހުސްވުމަށްފަހު ތިން މަހާ ބާރަ ދުވަސް އަލުން ޕާމަނަންޓް ސެކްރެޓަރީއެއް އައްޔަން ކުރުމަށް މިހޭދަވެގެން މިދިޔައީ. 104 ދުވަސް. މިކަމުގައި ވޭތުވެއްޖެ. އަޅުގަނޑަށް ޕާމަނަންޓް ސެކްރެޓަރީއެއް އައްޔަން ވެއްޖެކަން އެންގެވިތާ ބަރާބަރު 42 ދުވަސްފަހުން ކޮމިޝަނުން މިނިސްޓްރީގެ މަސައްކަތަށް ޕާމަނަންޓް ސެކްޓްރީއަށް ތިޔަ ފޮނުއްވައިދެއްވީ.ފޮރިން މިނިސްޓަރު ޝާހިދު
ސަރުކާރެއް އަންނަނީ ރައްޔިތުންނަށް ވަޢުދުތަކެއް ވެގެންކަން ފާހަގަކުރައްވައި މިނިސްޓަރު ޝާހިދު ވިދާޅުވީ ސީއެސްސީގެ މަސައްކަތްތައް ހަލުވި ސްޕީޑެއްގައި ކުރަން ޖެހޭކަމަށެވެ.
އަޅުގަނޑަކީ މިދެންނެވިހެން ސަރުކާރުގެ މަސްއޫލިއްޔަތު އަދާކޮށްދިނުމަށް ރައްޔިތުންނަށް ޚިދުމަތް ދިނުމަށް ގާނޫނީ ހުވާކޮށްގެން ހުރި ވަޒީރެއް. ސިވިލް ސަރވިސް ކޮމިޝަނަކީ އަޅުގަނޑު އެމަސައްކަތް ކުރުމަށް އަޅުގަނޑުމެން ނިސްބަތްވާ ސަރުކާރުން އެޚިދުމަތްތައް އަދާކޮށްދިނުމަށް ދެންމެ ކޮމިޝަންގެ ފަރާތުން ވިދާޅުވިހެން އެހީތެރިވެދިނުމަށް އޮތް ކޮމިޝަނެއް. ސަރވިސްއެއް. އޭގެ ބަދަލުގައި ފެނިގެން މިދަނީ އެކަށީގެން ނުވާހާ ގިނަ ދުވަސް މިކަމުގައި ސިވިލް ސަރވިސް ކޮމިޝަނުން ހޭދަކުރައްވާތަން.ފޮރިން މިނިސްޓަރު ޝާހިދު
މިނިސްޓަރު ޝާހިދު ވިދާޅުވީ ދައުލަތަށް ލަސްކަން އައުމަށް ސީއެސްސީއަށް އޭގެ ބަދުނާމު ނުދާނެ ފަދަ ގޮތަކަށް މަސައްކަތްތައް ރާވާ ކުރިއަށް ގެންދިއުމަށް އިލްތިމާސްކުރާ ކަމަށެވެ. އަދި ކުރިއަށް އޮތްތާގައި މަސައްކަތްތައް ރަނގަޅުކުރާނެ ކަމަށް އުންމީދުކުރައްވާ ކަމަށްވެސް މިނިސްޓަރު ވިދާޅުވިއެވެ.
