ރާއްޖޭގައި އެންމެ ފުރަތަމަ ފަހަރަށް އެމްބާމިންގް ޕްރޮސީޖަރ ޓްރީ ޓޮޕް ހޮސްޕިޓަލުގައި ކޮށްފިއެވެ.

އެ ހޮސްޕިޓަލުން މި ޕްރޮސީޖަރ ކޮށްފައިވަނީ މި މަހުގެ 19 ވަނަ ދުވަހުއެވެ. އެމްބާމިންގް އަކީ މަރުވުމަށް ފަހު، ހަށިގަނޑު ބޭރަށް ފޮނުވުމަށް ހަލާކުވެނުދާނެ ގޮތަށް ރައްކާތެރިކުރުމަށް ކުރާ ޕްރޮސީޖަރއެކެވެ. ޓްރީ ޓޮޕް ހޮސްޕިޓަލުގެ މޯޗަރީ ޚިދުމަތުގެ ދަށުން ރާއްޖޭގައި އަލަށް މި ޚިދުމަތް ތަޢާރަފުކޮށްފައިވަނީ 2 ޖޫން 2019 ގައެވެ.

ޓްރީ ޓޮޕް ހޮސްޕިޓަލުގައި ބައިނަލްއަޤުވާމީ ޤަވާއިދުތަކާއި އެއްހަމައެއްގައި މި ޚިދުމަތް ފޯރުކޮށްދިނުމުގައި ޙަރަކާތްތެރި ވަނީ ލައިސެންސް ލިބިފައިވާ ޤާބިލު ބޭފުޅުން ކަމަށް އެ ހޮސްޕިޓަލުން މަޢުލޫމާތުދެއެވެ. އަދި މި ޚިދުމަތާއެކު ބައިނަލްއަޤުވާމީ ފެންވަރުގެ އެމްބާމްކުރެވިފައިވާކަމުގެ ސެޓްފިކެޓެއް އެމްބާމްކުރެވޭ ފަރާތަށް ދެވޭނެއެވެ.

އެމްބާމިންގެ މި ޚިދުމަތަކީ ރާއްޖޭގެ އަދި ދުނިޔޭގެ ޤަވާއިދުތަކުގެ ދަށުން، ނިޔާވެފައިވާ ފަރާތުގެ ހަށިގަނޑަށް އިޙުތިރާމުކޮށް، ގެއްލުންނުވާނެހެން ނަގަންޖެހޭ އެންމެހާ ރައްކާތެރި ފިޔަވަޅުތަކާއެކު ދެވޭ ޚިދުމަތެއް ކަމަށް އެ ހޮސްޕިޓަލުން ބުނެއެވެ.