މީގެކުރިން ކައުންސިލްތަކުން މުވައްޒަފުން ބޭނުންވެގެން އެކަމަށް ހުއްދަ ހޯދުމަށް ފިނޭންސް މިނިސްޓްރީއަށް ފޮނުވަން ޖެހުނަސް މިހާރުގެ އާ އޮނިގަނޑުގެ ދަށުން އެކަން އެގޮތަށް ކުރަން ނުޖެހޭނެކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެ އެވެ.
ހދ. ކުޅުދުއްފުށި ސިޓީގައި އެމްޑީޕީން އިންތިޒާމުކޮށްގެން ކުރިޔަށްގެންދިޔަ "ތިލަދުންމަތި އިރުވައި ކޮންފަރެންސް" ގެ ބައިވެރިން އެކަމާއި ގުޅޭގޮތުން ކުރި ސުވާލަކަށް ޖަވާބު ދެއްވަމުން މިނިސްޓަރ ވިދާޅުވީ މިހާރު ޤާނޫނަށް އައިސްފައިވާ ބަދަލާއެކު އެކަން ފިނޭންސް މިނިސްޓްރީން ކުރުމުގެ ވިސްނުމެއް ނުގެންގުޅުއްވާކަމަށެވެ. އެހެންނަމަވެސް ކައުންސިލްތަކުން ބަޖެޓް ހަދާއިރު ކައުންސިލްތަކަށް ބޭނުންވާ މުވައްޒަފުންނާއި މުސާރައާއެކު ހިމަނަންޖެހޭނެ ކަމަށް މިނިސްޓަރ ވިދާޅުވިއެވެ.
އެކަންކަން ހުންނަންވާނީ ރަނގަޅަށް ބަޖެޓް ކުރެވިފައިކަމަށް މިނިސްޓަރ ވިދާޅުވިއެވެ. ކައުންސިލްތަކުން ބޭނުންވާ ދާއިރާއަކުން މުވައްޒަފުން ނެގުމުގެ މިނިވަންކަން ކަައުންސިލްތަކަށް ލިބިގެންދާނެ ކަމަށާއި ނަމަވެސް އެކަން ހުންނަންވާނީ ބަޖެޓްގައި ޖެހިފައިކަމަށް މިނިސްޓަރ ވިދާޅުވި އެވެ.
މިދަންނަވާ ވާހަކައަކީ ތިބޭފުޅުން ބަޖެޓް ހަދާއިރު ކުރިޔަށް އޮތްއަހަރު ތެރޭގައި ނަގަންބޭނުންވަނީ މިސާލަކަށް ސަރވޭއަރެއް، އިންޖިނިއަރެއް، ޓެކްނިކަލް އެކައުންޓެންޓެއް މިވެނި މީހެއް. މިމީހުންނަށް ތިމަންނަމެން ބޭނުންވަނީ މިވެނި މުސާރައޭ. އެބަޖެޓް ރަނގަޅަށް ކުރަންވަންވާނޭ. އެބަޖެޓް ކުރާއިރު އެބަޖެޓް ހަދަންވާނީ މިސާލަކަށް އަޅުގަނޑުމެން މިދޭ ގްރާންޓް ބްލޮކް ގްރާންޓަށް ބަލައިގެން އެ ގްރާންޓުން ވާވަރަށް ބަޖެޓް ހަދަންވާނީ. އޭގެއިތުރަށް ބަޖެޓް ހަދާއިރު އަޅުގަނޑުމެން ކައުންސިލްތައް ބަޖެޓް ހަދާ އުސޫލު ގައި ހިމަނާފައިވާނެ ބަޖެޓް ހަދާ އިރު ރިކަރެންޓް އެކްސްޕެންޑިޗަރ ހުންނަން ޖެހޭނެ އިންސައްތަ ކެޕިޓަލް އެކްސްޕެންޑިޗަރ ހުންނަންޖެހޭ އިންސައްތަ އެހުރިހާ ބެންޗުމާކްތަކަށް ބަލައިގެން ތިބޭފުޅުން ބަޖެޓް ހަދާއިރު ތިބޭފުޅުންގެ އަމިއްލަ މިނިވަންކަމުގެ ތެރޭގައި އިތުރު މުވައްޒަފުންވެސް ނެގިގެންދާނެ. އެހެންވީމާ އޭގެ އެއްވެސް ހުރަހެއް ނޯންނާނެ ކުރިޔަށް އޮތްތަނުގައި.ފިނޭންސް މިނިސްޓަރ އިބްރާހީމް އަމީރު
މިނިސްޓަރ ވިދާޅުވީ ނަގާނެ މުވައްޒަފުންގެ ޢަދަދާއި މުސާރަ ކަނޑައަޅާނީ އެ ކައުންސިލަކުން ކަމަށާއި އެކަމުގައި އެންމެ ރަނގަޅަށް ނަތީޖާ ޙާޞިލުކުރެވޭނެ ގޮތަކަށް ވިސްނުމަކީ މުހިންމު ކަމެއް ކަމަށެވެ.
