ރާއްޖޭގެ އުތުރުގެ ރަށެއްގެ ސުކޫލެއްގެ ޕްރިންސިޕަލަކު ދަރިވަރަކަށް ޖިންސީ ގޯނާ ކުރި މައްސަލައެއް ފުލުހުން ބަލަން ފަށައިފިއެވެ.
އެކަމާ ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލު ވިދާޅުވީ، އެ ހާދިސާ ހިނގާފައިވަނީ އުތުރުގެ ރަށެއްގައި ކަމަށާއި، ހާދިސާގެ ރިޕޯރޓް ފުލުހުންނަށް ލިބިފައިވަނީ ހޯމަ ދުވަހުގެ ރޭގެ ވަގުތެއްގައި ކަމަށެވެ. ނަމަވެސް އެކަމާ ގުޅޭ އިތުރު ތަފްސީލު ހާމަކުރެވެން ނެތް ކަމަށް ފުލުހުން ބުނެފައިވެއެވެ.
އެ މައްސަލަ ފުލުހުން ދަނީ އިތުރަށް ތަހުޤީޤު ކުރަމުންނެވެ.
ޖިންސީ ގޯނާގެ މައްސަލަތައް އިތުރުވެފައިވާއިރު، މިއަހަރުގެ މިހާތަނަށްވެސް ޖިންސީ ގޯނާގެ 360 މައްސަލައެއް ފުލުހުންނަށް ވަނީ ރިޕޯޓް ކުރެވިފައެވެ.
