އެއަރ އިންޑިއާ އަދި ސަރުކާރުގެ ހިއްސާ އޮންނަ އިތުރު ދެ ކުންފުނި ވިއްކާލާނެ ކަމަށް އިންޑިއާގެ ފިނޭންސް މިނިސްޓްރީގެ އޮފިޝަލަކު ވިދާޅުވެއްޖެއެވެ.

ބަހާރާތް ޕެޓްރޯލިއަމް ކޯރޕް ލިމިޓެޑްއާއި ލޮޖިސްޓިކްސް ކުންފުނި ކޮންޓައިނަރ ކޯރޕް އޮފް އިންޑިއާ ލިމިޓެޑް ވެސް ވިއްކާލުމުގެ ވިސްނުން ސަރުކާރުން ގެންގުޅެނީ، 2020 ވަނަ އަހަރުގެ މާޗް މަހާއި ހިސާބަށް އަންނައިރު 600 ބިލިއަން ރުޕީސް ހޯދުމަށް ކަމަށް ފިނޭންސް މިނިސްޓްރީގެ އޮފިޝަލް މައުލޫމާތުދެއެވެ. 2019 ވަނަ އަހަރު ނިމުމުގެ ކުރިން ނުވަތަ 2020 އަހަރުގެ ފުރަތަމަ ކޮޅު ކުންފުނިތައް ވިއްކާލާނީ ބޭރުގެ ކުންފުންޏަކަށް ނުވަތަ އިންޑިއާގެ ވިޔަފާރިވެރިއެއްގެ ކުންފުންޏަކަށެވެ.

ޕްރައިމް މިނިސްޓަރުގެ އޮފީހުން ވަނީ ފިނޭންސް މިނިސްޓްރީއިން ސަރަކާރުގެ ހިއްސާއޮންނަ ކުންފުނިތައް މިގޮތަށް ވިއްކާތީވެ ނުރުހުން ފާޅުކޮށްފައެވެ. ފިނޭންސް މިނިސްޓްރީއިން ވަނީ މީގެ ކުރިން ހިންދުސްތާން ޕެޓްރޯލިއަމް ކޯރޕް ލިމިޓެޑް، އޮއިލް އެންޑް ނެޗުރަލް ގޭސް ކޯރޕް ލިމިޓެޑަށް ވިއްކާލާފައެވެ.