އއ. އުކުޅަހުގައި ބާއްވާ ޓެކް ފެއަރ އަދި އިންޓަނޭޝަނަލް ކޮންފަރެންސްގެ ސަބަބުން ދިވެހިވަންތަ ޓެކްނޮލޮޖީތައް އުފަންވެގެންދާނެ ކަމަށް ޕްރޮފެސަރު ހަސަން އުގައިލް ވިދާޅުވެއްޖެއެވެ.

އުކުޅަހުގައި ބާއްވާ ފެއަރގައި އިނގިރޭސިވިލާތުގެ އިތުރުން ދުނިޔޭގެ އެކި ކަންކޮޅުތަކުން 50 އަކަށް ސައިންޓިސްޓުން ބައިވެރިވާނެއެވެ. އެ މަހާސިންތާ ދެބަޔަކަށް ބަހާލައިގެން ކުރިއަށްގެންދާއިރު، ފުރަތަމަ ބަޔަކީ އިންޓަނޭޝަނަލް ކޮންފަރެންސް އަދި ދެވަނަ ބަޔަކީ ޓެކް ފެއާގެ ބަޔެވެ.

ރާއްޖެ.އެމްވީ އަށް މައުލޫމާތު ދެއްވަމުން ޕްރޮފެސަރު އުގައިލް ވިދާޅުވީ، އެ މަހާސިންތާ ރާއްޖޭގައި ބާއްވަން, އެކަން އިންތިޒާމުކުރާ ފަރާތުން މީގެ ކުރިންވެސް އެދިފައިވާ ކަމަށެވެ. ކޮންފަރެންސް އާއި ފެއަރ މާލެގައި ނުވަތަ ރިސޯޓުގައި ވެސް ބޭއްވެން އޮތް ކަމަށާއި، ނަމަވެސް ތަފާތު ކުރުމުގެ ގޮތުން ބޭނުންވީ އެ ކޮންފަރެންސް ''ޖަޒީރާ'' ރަށެއްގައި ބޭއްވުމަށް ކަމަށެވެ.

އެ މަހާސިންތާ ގައި މަސްނުވީ ވިސްނުމުގެ ދާއިރާ ވަަރަށް ފުޅާގޮތެއްގައި މަޝްވަރާ ކުރެވިގެންދާނެ ކަމަށާއި، އެ ދާއިރާގެ ފުންނާބު އުސް ޕްރޮފެސަރުން ވެސް ބައިވެރިވާނެ ކަމަށް އިނގިރޭސިވިލާތުގެ ބްރަޑްފޯޑް ޔުނިވާސިޓީ ގައި ކިޔަވާދެއްވާ އުގައިލް ވިދާޅުވިއެވެ.

ގާތްގަޑަކަށް 250 އަކަށް މީހުން އެ މަހާސިންތާ ގައި ބައިވެރިވެއެވެ.

ދުނިޔޭގެ ކޮންމެ ގައުމަކުން ވެސް ޓެކްނޮލޮޖީ ގެނެވިދާނެކަން ފާހަގަކުރައްވަމުން އުގައިލް ވިދާޅުވީ، ރާއްޖޭގެ ޓެކްންލޮޖީ ތައްޔާރުކުރަން ޖެހެނީ ދިވެހިވަންތަ ގޮތަށް ކަމަށެވެ. އުގައިލް ވިދާޅުވީ، ސަރުކާރުގެ އެކި ފަރާތްތަކުން ފެއަރ ގައި ބައިވެރިވުމުގެ ސަބަބުން ގިނަ ދިވެހި އުފެއްދުންތައް ނިކުމެގެން ދާނެ ކަމަށް ގަބޫލްފުޅު ކުރައްވާ ކަމަށެވެ.

ކޮންފަރެންސް ޓޫރިޒަމް ފުޅާގޮތެއްގައި ރާއްޖޭގައި ކުރިޔަށް ގެންދެވިދާނެ ކަމަށާއި، ގިނަ ސައިންސްވެރިން ތަކެއް ރާއްޖެ ވަޑައިގަތުމަކީ މީހުންގެ ހޭލުންތެރިކަން އިތުރުވުމަށް ލިބިގެންދިޔަ ފުރުސަތެއްގެ ގޮތުގައި އުގައިލް ފާހަގަކުރެއްވިއެވެ.