އަފްއާނިސްތާނުގެ ވެރިރަށް ކާބުލްގެ ކައިވެނި ހަފްލާ އެއްގައި ބޮމެއް ގޮވައި 20 މީހަކު ޒަހަމްވެއްޖެއެވެ.
ހުޅަނގު ކާބުލް ގައި ހުންނަ ''ދުބާއި ސިޓީ ވެޑިން'' ހޯލްގައި ހޮނިހިރު ދުވަހު ދިން ބޮމުގެ ހަމަލާގެ ޒިންމާ އަދި މިހާތަނަށް އެއްވެސް ފަރާތަކުން ނަގާފައެއް ނުވެއެވެ.
އަފްއާނިސްތާނުގެ އިންޓީރިއާ މިނިސްޓްރީގެ ތަރުޖަމާނު ނަސްރަތް ރަހީމީ ވިދާޅުވީ، ލަފާކުރެވޭ ގޮތުން ވިއްސަކަށް މީހުން ޒަހަމްވެފައިވާ ކަމަށެވެ. އަދި އިތުުރު މައުލޫމާތު ހޯދުމުގެ މަސައްކަތް ކުރަމުންދާ ކަމަށް އޭނާ ވިދާޅުވިއެވެ. މަންޒަރު ދުށް މީހަކު ބުނީ، އެ ހަފްލާއަކީ ޝީ މުސްލިމުން ބޭއްވި ކައިވެނި ހަފްލާއެއް ކަމަށެވެ.
ހަތިޔާރު އެޅި ސުންނީ މުސްލިމް ޖަމާއަތްތައް ކަމަށްވާ ތާލިބާނުންނާއި އައިއެސް އިން އަފްޢާނިސްތާނުގެ އިތުރުން އެ ގައުމުގެ އަވަށްޓެރިން ކަމަށްވާ ޕާކިސްތާނުގެ ޝީ މުސްލިމުންނަށް އަމާޒުކޮށް ދޭ ހަމަލާތައް ވަނީ އިތުރުވެފައެވެ.
