އަވަށްޓެރި އިންޑިއާގެ މިނިވަން ދުވަހާ ގުޅިގެން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އެޤައުމަށް ތަހުނިޔާ ވިދާޅުވެއްޖެއެވެ.
އިންޑިއާގެ 73 ވަނަ މިނިވަން ދުވަސް ބުރާސްފަތި ދުވަހު ފާހަގަ ކުރަމުންދާއިރު، މިނިވަން ދުވަހުގެ ތަހުނިޔާ ފޮނުއްވަމުން ރައީސް ނަޝީދު ކުރެއްވި ޓްވީޓެއްގައި ވިދާޅުވީ، އިޤްތިސާދީ ގޮތުން އިންޑިއާ ހަލުވި މިނެއްގައި ކުރިއަރަމުންދާއިރު، ސައުތު އޭޝިއާގެ އެހެން ޤައުމުތަކުން ވެސް އެ ކުރިއެރުމާ ހަމަކޮށް، އެކަމުގައި ބައިވެރިވާންޖެހޭނެ ކަމަށެވެ.
Happy Independence Day to all my Indian friends! As India’s economy roars ahead other South Asian nations must find a way to connect to it, and share in India’s rising prosperity.
— Mohamed Nasheed (@MohamedNasheed) August 15, 2019
އެމަނިކުފާނު އެހެން ވިދާޅުވެފައިވާއިރު، އިންޑިއާއަކީ ރާއްޖެއާއި އަވަށްޓެރި ގާތް ގުޅުމެއް ބާއްވަމުންދާ ގައުމެއް ކަން ފާހަގަ ކުރައްވައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުވެސް ވަނީ އިންޑިއާއަށް މިނިވަން ދުވަހުގެ ތަހުނިޔާ ފޮނުއްވާފައެވެ.
އެގޮތުން ރައީސް ސޯލިހު ވިދާޅުވީ، ކުރިއަށް އޮތް ތަނުގައި ވެސް ދެގައުމުގެ ދެމެދުގައިވާ އެކުވެރިކަން ދެމިއޮންނާނެ ކަމަށާއި، ދެ ގައުމުގެ ކުރިއެރުމަށްޓަކައި އެކުގައި މަސައްކަތް ކުރައްވާނެ ކަމަށެވެ.
އޭގެ އިތުރުން ސަރުކާރުގެ ބައެއް އިސް ވެރިންނާއި، ނައިބްރައީސް ފައިސަލް ނަސީމް ވެސް ވަނީ އިންޑިއާއާ އޮންނަ ގުޅުން އަބަދުވެސް އެގޮތުގައި ދެމިއޮތުމަށް އެދިވަޑައިގަންނަވާ ކަމަށް ވިދާޅުވެ އެ ޤައުމަށް މިނިވަން ދުވަހުގެ ތަހުނިޔާ ވިދާޅުވެފައެވެ.
Sending greetings and warm wishes to PM @narendramodi and the brotherly people of India. May the close friendship between two countries continue to grow stronger.
— Faisal Naseem (@FaisalNasym) August 15, 2019
އިންޑިއާއާ އޮންނަ ގުޅުން ބަދަހި ކުރުމަށް މި ސަރުކާރުން މަސައްކަތް ކުރާއިރު، އެޤައުމުން ރާއްޖެ އަށް އެކި ގޮތްގޮތުން އެހީތެރިކަން ފޯރުކޮށްދެމުން ގެންދެއެވެ. އެގޮތުން ރާއްޖޭގެ ތައުލީމީ އަދި ސިއްހީ ދާއިރާ ކުރިއެރުވުމުގެ އިތުރުން އަސްކަރީ ގޮތުން ވެސް އިންޑިއާއިން ގިނަ އެހީތަކެއް ވެދީފައިވެއެވެ.
އިނގިރޭސިންގެ އަތްދަށުން މިނިވަންވެ އިންޑިއާ މިނިވަން ޤައުމެއްގެ ގޮތުގައި ކަނޑައަޅާފައިވަނީ 1947 ވަނަ އަހަރުގެ އޮގަސްޓް މަހުގެ 15 ވަނަ ދުވަހުއެވެ.
