ހަތްގުރުސް ފެންމަތިވެ، ކަޅުހިލަދަޔަށް ވަޅި ވަދެއްޖެއެވެ. ކަރުތާފެނަށް ފެން އަރާ ދެންވާ ގެނބިދާނެ ކަމުގެ ބިރުވެރި އިހްސާސް ކުރެވިއްޖެއެވެ. ކިސްރާގެ ކޮއިލު އަނދައިގެން ދިޔަ ފަދައިންނެވެ. ފާރިސީން އަޅުކަން ކުރި އަލިފާންގަނޑު ނިވުނު ގޮތަށެވެ. ކުރުކޮށް ފޮނިކޮށް ބުނަންޏާ ރޯމުން ކުރި ވަރުގަދަ ވެރިކަން ބިމާ ހަމަވި ގޮތަށް ރައީސް އަބްދުﷲ ޔާމީންގެ ވެރިކަން ވެއްޓިދާނެ ކަމުގެ ކުލަވަރު ފެންނާން ފަށައިފިއެވެ.

ރައީސް ޔާމީން، އާރާއި ބާރުގައި ވެރިކަން ކުރައްވަމުން ވަޑައިގެންނެވީ ރައްޔިތުންގެ މަޖިލީހުގެ ފުރިހަމަ މެޖޯރިޓީ އޮވެގެންނެވެ. ރައީސް ޔާމީން ހިތުހުރި ކަމެއް ފާސްކޮށް ބޭނުންވާ ގޮތަކަށް ޤައުމު ހިންގުމަށް ފައްސިޔަ އޮތަތީވެއެވެ. އެގޮތުގައި ދައުރު ފުރިހަމަ ނުކުރެވެނީސް މުޅި ކޯލިޝަން ފަޅައިގެން ހިނގައްޖެއެވެ. ވެރިކަން ހޯދުމަށް ހެދި ކޯލިޝަން ރޫޅިގެން ހިނގައްޖެއެވެ. އެވަރުންވެސް އޮތް ސަރުކާރުގެ ބާރުވެރިކަމާއި ޖުޑިޝަރީގެ މެޖޯރިޓީއާއެކު ރައްޔިތުންގެ މަޖިލީހުގެ މެޖޯރިޓީ އޮތީ ރައީސް ޔާމީންގެ އަތްމަތީގައެވެ. ނަމަވެސް ނިމިދިޔަ ލޯކަލް ކައުންސިލް އިންތިޚާބުގައި ރައްޔިތުން ސަރުކާރަށް ނޫނެކޭ ބުނި ބުނުމާއި ސަރުކާރު ހަމައިން ނެއްޓުނީތީ މެންބަރުން ރައްޔިތުންނަށްޓަކައި ތެދުވެއްޖެއެވެ. ޤައުމު އިސްކޮށްފިއެވެ. ރައީސް ޔާމީނަށާއި ސަރުކާރަށް އަދި ސަރުކާރުގެ މިޕާޓީ ޕީޕީއެމަށް ފާޅުގައި ނޫނެކޭ ބުނެފިއެވެ.

ސަރުކާރުން ކަންކުރަމުންދާ ގޮތުގެ ސަބަބުން ސަރުކާރު ފަޅީގައި ތިބި ރައްޔިތުންގެ މަޖިލީހުގެ މެންބަރުންތަކެއް އިދިކޮޅު ފަރާތްތަކަށް އެއްބާރުލުން ދޭން ނިންމިއެވެ. ރައްޔިތުންގެ މަޖިލީހުގެ ތެރެއިން ބޮޑެތި އިސްލާހީ ބަދަލުތަކެއް ގެނައުމަށް ފެށި މަސައްކަތައް ހުރަހަކަށްވި ރައްޔިތުންގެ މަޖިލީހުގެ ރައީސް ޢަބްދުﷲ މަސީހު އެމަޤާމުން ބޭރުކުރުމަށް ނިންމި ނިންމުމަށް ތާއީދުކޮށް ވޯޓު ދިނުމަށް ނިންމިއެވެ.

މިކަން ވެގެން ދިޔައީ ބަލިކަށިވަމުންދިޔަ ސަރުކާރުގެ ވަރަ ބިންދާލުންފަދަ ކަމެކެވެ. އިސާހިތަކު ސަރުކާރުން ދުއްވައިގަތީ ސަރުކާރުން ބުނިއްޔާ ބުނިހާ ކަމެއް ކޮށްދިން މަޖިލިސް ދޫކޮށްލާފައި މުޅިން އެހެން ދިމާލަކަށެވެ. ކޯޓު މެދުވެރިކޮށް ވެރިކަމުގައި ވިއްދާ ކައްތިރިއަކަށް ސުޕްރީމް ކޯޓު ހެދުމަށެވެ. އެކަން ކުރުމަށްޓަކައި ދައުލަތުގެ ނަމުގައި ސުޕްރީމް ކޯޓަށް ވައްދާލީ އާދައިގެ މައްސަލައެއް ނޫނެވެ. ޕާޓީގައި ތިބި މެންބަރުން ސަރުކާރާ ދެކޮޅަށް ވޯޓު ދެއްވަފާނެތީ އެމެންބަރުން މަރުތަޅު އެޅުވުމަށެވެ. ދިވެހި ރައްޔިތުންގެ ނަމުގައި ބަންޑާރަ ނައިބު ހުށަހެޅުއްވި މައްސަލައިގައި އެދިވަޑައިގެންނެވީ، ގާނޫނު އަސާސީގެ 26 ވަނަ މާއްދާގެ (ނ) އާއި، ގާނޫނު އަސާސީގެ 30 ވަނަ މާއްދާގެ (ހ) އާއި، ގާނޫނު އަސާސީގެ 74 ވަނަ މާއްދާގެ އިތުރުން ގާނޫނު އަސާސީގެ 75 ވަނަ މާއްދާ މާނަކޮށް، މަޖިލިހަށް އިންތިޚާބްވާއިރު ހުންނަ ޕާޓީން ވަކިވެއްޖެ ނަމަ ނުވަތަ، އެހެން ޕާޓީއަކަށް ބަދަލުވެއްޖެ ނަމަ ނުވަތަ ޕާޓީން ވަކިކޮށްފިނަމަ ގެއްލޭނެ ކަމަށް ކަނޑައަޅައި ދިނުމަށެވެ.

އިސާހިތަކު ރައީސް ޔާމީންގެ ރަން ބުއްދިން ދެއްވި މޮޅު ޚިޔާލާއެކު ބަންޑާރަނައިބު ހުށަހެޅި މައްސަލައާއެކު ހީވި ދަށް އުޑުން ބާރަށް ގުގުރާލި ހެންނެވެ. ޖޫން ޖުލައިގެ ގަދަވަޔާއި ވިއްސާރައިގައި ޕީޕީއެމް ތަޅާލައިފިއެވެ. ފުޅަށްތަކުގެ ކައްތިރި ވެއްޓި މުޅި ޕީޕީއެމް ބިންމަތިވެއްޖެއެވެ. މިހާތަނަށް އެއް ޕާޓީއަކުން ރައްޔިތުންގެ މަޖިލީހުގެ މެންބަރުން އެންމެ ގިނަ އަދަދަކުން ޕާޓީން ވަކިވި ކަމުގެ ލަދުވެތި ޝަރަފް އެލިބުނީ ޕީޕީއެމަށެވެ. ބަސްބުނި ހިނދުން ސަރުކާރަށް ލިބިދީފައި އޮތް ރައްޔިތުންގެ މަޖިލީހުގެ މެޖޯރިޓީ އެވަނީ ގެއްލިފައެވެ. މަސީހާ ދެކޮޅަށް ހުށަހެޅި މައްސަލައިގައި ޕީޕީއެމްގައި ތިބެގެން ސޮއިކުރެއްވި މެންބަރުން އެވަނީ ޕީޕީއެމުންވެސް ވަކިވެވަޑައިގެންފައެވެ.

ކޮންމެއަކަސް ސަރުކާރު ސައިވެއްޖެއެވެ. ހަތަރުފަރާތުންވެސް ބެދި އަރާނެ ގޮޅި ހުސްވެއްޖެއެވެ. ރައީސް ޔާމީންގެ އާރާއި ބާރު ކެނޑިއްޖެ ކަމުގެ ނިޝާންތައް ފެންނަން ފަށައިފިއެވެ. ކޯޓު އަމުރުތައް ލިބުން ދަތިވެއްޖެއެވެ. އިތިފާގުން ނަމަވެސް ސަރުކާރު ބޭނުންވާ ގޮތައް މައްސަލަތައް ނިންމައިދޭ ބާރީ ޤާޒީގެ މަޤާމް ސަރުކާރުން އަތުލައިފިއެވެ. ފަހު ލޮންސިވެސް އެންމެފަހުން އެއްލާލައިފިއެވެ. ދެން އޮތީ ހަމަ އެންމެ ކަމެއް ސަރުކާރުން ހުށަހެޅި ގޮތަކަށް ސަރުކާރުން ބޭނުންވާ ގޮތަކަށް ސުޕްރީމް ކޯޓުން ކަންކޮށް ދިނުމެވެ. އިންސާނީ ހަމައެއް ޤާނޫނެއް އމުދުން ޤާނޫން އަސާސީއަކަށް ބެލުމެއްނެތި ވަކި މީހަކު ބޭނުންވާ ގޮތައް ކަންކޮށްދިނުމެވެ. ސުޕްރީް ކޯޓުން އެކަން އެގޮތައް ނިންމައިދިނުމެވެ. އެހެން އެކަން އެގޮތައް ނިންމައިފިނަމަ އެފެށުނީ މުޅިން އެހެން ކަމެކެވެ. އެއީ ބަލި ނުވުމެއް ނޫނެވެ. ބޮޑު ބައްޔަކުން ބަލިވެ މުޅިން އެހެން ވެރިކަމެއް ފެށުނީއެވެ. އެކަމަކު އޭރުން އެއީކީ ރައްޔިތުންގެ ވެރިކަމެއް ނޫނެވެ. އޭރުން އެސަރުކާރު އެހިންގަނީ ދިވެހިންގެ ދިވެހި ޤައުމަކު ނޫނެވެ. އޭރުން އެފެށޭ ވެރިކަމަކީ "ސުޕްރީމް ކޯޓުން ފަށައިދެން" މުޅިން އެހެން ސަރުކާރަކަށް ވެގެން ދާނެއެވެ. އަމިއްލަ މީހަކަށް ހަދައިދޭ ކުންފުންޏެއްގެ ވެރިކަމަކަށެވެ. ފަހަރުގައި އެއީ އެވެރިކަމުގެ ނަމަކަށް "ޢަބްދުﷲ ޔާމީން ޕްރައިވެޓް ލިމިޓެޑް" އަށް ވުމަކީ އެކަށީގެންވާ ކަމެކެވެ.